NASA-ს ინფორმაციით, მეცნიერთა საერთაშორისო ჯგუფმა, კეპლერის K2 მისიის ფარგლებში კიდევ 104 ეგზოპლანეტა აღმოაჩინეს. ამ კვლევის შედეგად, ასტრონომებმა 197 კანდიდატი აღმოაჩინეს, მათგან მხოლოდ 104-მა მიიღო პლანეტის კლასიფიკაცია.

ახლადაღმოჩენილ პლანეტებს შორის ოთხი კანდიდატი შესაძლოა მყარი ზედაპირის მქონე სხეული იყოს. ოთხივე მათგანი დედამიწაზე 20 და 50 პროცენტით დიდია დიამეტრში და M კლასის წითელი გიგანტის, K2-72-ის გარშემო ბრუნავენ. სისტემა დედამიწიდან 181 სინათლის წელიწადითაა დაშორებული, მერწყულის თანავარსკვლავედის მიმართულებით.

პლანეტების აღმოსაჩენად მეცნიერები ე.წ. ტრანზიტის მეთოდს იყენებენ. როდესაც პლანეტა თავის ვარსკვლავს ჩაუვლის, მისგან მომავალი სინათლის მცირე ნაწილს ბლოკავს. ასეთ ბლოკებს ასტრონომები აკვირდებიან და თუ რამდენჯერმე დააფიქსირეს, ეს ნიშნავს, რომ ახალი პლანეტა აღმოაჩინეს.

სიკაშკაშის ცვლილებების მიხედვით შესაძლებელია ახლად აღმოჩენილი ციური სხეულის ზომის განსაზღვრაც. ვარსკვლავის დისკზე პლანეტის ჩავლის ტემპის მიხედვით მისი ორბიტის სიგრძისა და ზედაპირის ტემპერატურის მიახლოებითი გამოთვლაც ხერხდება. ამ პარამეტრების მიღების შემდეგ ასტრონომები ასკვნიან, შესაძლებელია თუ არა ამ ობიექტზე არსებობდეს სიცოცხლე ან მისთვის საჭირო პირობები.