თავდაცვის სამინისტროს ინფორმაციით, ჯარისკაცები საცხოვრებელ ადგილთან ახლოს იმსახურებენ. თინათინ ხიდაშელის მიერ გამოცემული ბრძანებით, ჯარისკაცი, რომელიც შეიარაღებულ ძალებში საცხოვრებელი ადგილიდან შორ მანძილზე მსახურობს და პირველი კონტრაქტიც დამთავრებული აქვს, კონკრეტული პრობლემების არსებობის შემთხვევაში, საცხოვრებელ ადგილთან ახლოს მსახურის შესაძლებლობა მიეცემა.

ბათუმში დისლოცირებულ III ქვეითი ბრიგადის 31-ე ბატალიონის სამხედრო მოსამსახურეებთან შეხვედრისას, ხიდაშელის თქვა, რომ ჯარში სამსახური არ უნდა იყოს დაკავშირებული იმ ტიპის მსხვერპლის გაღებასთან, რომელიც ხელოვნურად არის შექმნილი და არ ემსახურება არც სამხედრო მოსამსახურის მოტივაციის ამაღლებას და არც საბრძოლო მზადყოფნის გაუმჯობესებას:

"შეიარაღებული ძალების სხვა ქვედანაყოფების მსგავსად, ამ ბატალიონის ერთ-ერთი პრობლემა სამხედრო მოსამსახურეების საცხოვრებელი ადგილიდან შორს ყოფნაა, რადგან დანაყოფი საზღვრის უკიდურეს ნაწილშია განთავსებული".

თავდაცვის მინისტრის თქმით, მანძილი საცხოვრებელ ადგილსა და სამხედრო ნაწილს შორის ჯარისკაცს მატერიალურ პრობლემებსაც უქმნის:

"ბუნებრივია, ყველა სამხედრო მოსამსახურეს თანაბარი ანაზღაურება აქვს. ეს ანაზღაურება არათანაბრად ნაწილდება მგზავრობის დროს, რადგან სამხედროს, რომელიც მოშორებით ცხოვრობს, მნიშვნელოვნად მეტი ეხარჯება. გარდა ამისა, არიან ადამიანები, რომელთაც ჩვეულებრივი ოჯახური პრობლემები აქვს - ზოგს მშობლები ჰყავთ ავად, ზოგი კი მრავალშვილიანია. ჯარისკაცებს, რომლებიც პრაქტიკულად, თვეების განმავლობაში ვერ ნახულობდნენ საკუთარ ოჯახებს, შევპირდით რომ დავეხმარებოდით. ორმოცდათორმეტივე სამხედრო მოსამსახურე უკვე გადანიშნულია საკუთარ საცხოვრებელ ადგილთან უფრო ახლოს".

თავდაცვის მინისტრის თქმით, გამოიცა ბრძანება, რომლითაც პირველი კონტრაქტის დამთავრების შემდეგ სამხედრო მოსამსახურეები, კონკრეტული პრობლემების არსებობის შემთხვევაში, არჩევანის მიხედვით საცხოვრებელ ადგილთან ახლოს იმსახურებენ.