ჩემპიონთა ლიგის ფინალის წინ მადრიდის რეალის კაპიტანმა სერხიო რამოსმა განაცხადა, რომ ლივერპულის ტრიოსი საერთოდ არ ეშინია.

"ჩემი კარიერის განმავლობაში საუკეთესო ფორვარდების წინააღმდეგ მითამაშია, მათ შორის ბევრი ყველა დროის ერთ-ერთ საუკეთესოდ ითვლება".

"შიში არავის მიმართ მქონია. პატივისცემა კი ბატონო, თუმცა შიში - არა", - აღნიშნა რამოსმა.

მისივე თქმით, მადრიდელებმა იციან, როგორ უნდა ითამაშონ ფინალში, რადგან ეს მათ დნმ-ში წერია.

"ქედმაღლობა არა, თუმცა თავდაჯერებულობა კი ნამდვილად გვჭირდება. ვიცით, რომ რეალის დნმ-ში წერია, რომ ჩემპიონთა ლიგა უნდა მოვიგოთ".

"საწყენად არ გამიგოთ, მაგრამ სეზონის დაწყებისას არავინ ელოდა, რომ ლივერპული ფინალამდე მიაღწევდა, თუმცა მათ აქამდე სრულიად დამსახურებულად მოაღწიეს".

"ჩვენ, როგორც გუნდმა, ვიცით, როგორ უნდა ვითამაშოთ ფინალი და სრულ მზადყოფნაში ვიქნებით".