აშშ აფრთხილებს თურქეთს, რომ მომხდარში მის შესაძლო ჩართულობასთან დაკავშირებით თურქეთის ოფიციალური პირების "მცდარი და მავნე" განცხადებები ცუდ გავლენას იქონიებს ორი ქვეყანას შორის არსებულ ურთიერთობაზე. ინფორმაციას BBC ავრცელებს.

აღნიშნული განცხადება აშშ-ს სახელმწიფო მდივანმა, ჯონ კერიმ მას შემდეგ გააკეთა, რაც თურქეთის შრომის მინისტრმა განაცხადა, რომ შესაძლოა თურქეთში მომხდარის უკან აშშ იდგეს.

ამასთან, რეჯეპ ტაიპ ერდოღანმა განაცხადა, რომ თურქეთის ხელისუფლების გადატრიალების ორგანიზატორი ფეტულა გულენია, რომელიც 1999 წლიდან ამერიკაში ცხოვრობს და მოუწოდა ამერიკას ან დააკავოს აღნიშნული პირი, ან გადასცეს ის თურქეთს.

თავის მხრივ, გულენი ერდოღანის ბრალდებას უარყოფს და ამბობს ამბოხების ორგანიზატორი ნებისმიერი შეიძლებოდა ყოფილიყო.

ბოლო მონაცემებით, მას შემდეგ, რაც თურქეთის ხელისუფლების გადატრიალების მცდელობა წარუმატებლად დასრულდა, თანამდებობა დაატოვებინეს 2,745 მოსამართლეს, დაკავებულია 140 მათგანი.

დაპატიმრებულებს შორის არიან სამხედრო მეთაურები, მათ შორის მეორე არმიის ხელმძღვანელიც, რომელიც საზღვარს სირიასთან, ერაყთან და ირანთან იცავს. ამასთან, ასობით სამხედრო პირი, რომლებსაც ბრალს გადატრიალების მონაწილეობაში სდებენ, ანკარაში გადაიყვანეს.

Reuters-ის ცნობით, გარდაცვლილია სულ ცოტა 265 ადამიანი, საიდანაც 161 მშვიდობიანი მოქალაქე ან პოლიციელი, დანარჩენი 104 კი გადატრიალებაში მონაწილე პირია. დაშავდა 1 000-ზე მეტი ადამიანი.

როგორც ერდოღანმა განაცხადა, გადატრიალების მცდელობაში მონაწილეებს მომხდარი "ძვირად დაუჯდებათ":

"ეს იქნება მიზეზი იმისთვის, რომ დავიწყოთ არმიის წმენდვა".