დღეს, პირველ მაისს, ნეონაცისტურმა დაჯგუფებამ, ქართულმა მარშმა კანცელარიასთან აქცია გამართა, სადაც პატრიოტთა ალიანსის წევრი და საქართველოს პარლამენტის დეპუტატი ადა მარშანია მონაწილეობდა. მან წაიკითხა წერილი, რომელიც მისივე თქმით, ირმა ინაშვილის ხელმოწერით გაუზგავნეს მთავარ პროკურორ ირაკლი შოთაძეს.

ადა მარშანია "სამართლიანობის პრინციპის დარღვევას" უწოდებს იმას, რომ ქართული მარშის წევრები დაპატიმრებულები არიან:

"ბატონო ირაკლი, ჩვენ გვესმის, რომ დამნაშავე დაუსჯელი არ უნდა დარჩეს, მაგრამ არსებობს სამართლიანობის პრინციპი და ადეკვატური სასჯელის ფორმა. ქართული მარშის არცერთი დაპატიმრებული წევრი საზოგადოებისთვის იმაზე მეტ საშიშროებას არ წარმოადგენს, ვიდრე [გიგა] ბოკერია, [გიგი] უგულავა და სხვები".

ქართული მარშის წევრის თქმით, მათ პროტესტს ორი პოლიტიკური პარტია შეუერთდა, ესაა პატრიოტთა ალიანსი და ნინო ბურჯანაძის პარტია დემოკრატიული მოძრაობა.

აქციაზე სიტყვით გამოვიდა ბურჯანაძის პარტიის წევრი დიმიტრი ლორთქიფანიძე.

კანცელარიის წინ, ქართულმა მარშმა, მათი დაპატიმრებული წევრების გათავისუფლების მოთხოვნით, "მასობრივი, უვადო, სასიკვდილო შიმშილობა" გამოაცხადა.