რესპუბლიკური საავადმყოფოს ექიმი ოფთალმოლოგი ბაჩო შენგელია ფეისბუქზე გავრცელებული ინტიმური ფოტოს გამო პირად გვერდზე ბოდიშს იხდის.

ბაჩო შენგელიას განმარტებით, 2018 წლის თებერვლის თვეში ინდოეთის ერთ-ერთ ქალაქში საქველმოქმედო მიზნით ექიმ ოფთალმოლოგად დაიწყო მუშაობა.

"ფოტოზე აღნიშნული ქალბატონი გავიცანი არასამედიცინო გარემოში და მთელი იქ ჩემი ყოფნის პერიოდში გვქონდა იდიალური ურთიერთობა მიუხედავად ეთნიკური, სოციალური, კანის ფერის და განსხვავებული რელიგიური მრწამსისა. სწორედ ჩემი ემოციის და ანტიქსენოფობიური მოსაზრების დაფიქსირება მსურდა იმ ქსენოფობიურ სიუჟეტზე რომელზეც ხანგრძლივი დისკუსია გავმართეთ. ემოციურ ფონზე სამწუხაროდ არასწორად და არაეთიკურად იქნა ჩემს მიერ გამოთქმული მოსაზრება გადმოცემული, თან მხოლოდ ეს არაეთიკური ნაწილი იქნა გამოყენებული (screen), რამაც ფეისბუქის მომხმარებლების აღშფოთება გამოიწვია. ამ არაკორექტული და არაეთიკური ნაწილის გამო მინდა ბოდიში მოვუხადო საზოგადოებას!", - წერს ბაჩო შენგელია.

ფოტო: Facebook

საქართველოს სახალხო დამცველის აპარატში მიიჩნევენ, რომ ფეისბუქის საშუალებით, ბაჩო შენგელიას მიერ ქალთან ერთად გადაღებული ინტიმური ფოტოს გავრცელებით, შესაძლოა, ქალის უფლებები დაირღვა. ფოტო შენგელიამ რასიზმის თემაზე მომზადებული სატელევიზიო გადაცემის ფეისბუქლინკის ქვეშ, კომენტარებში ინტიმური ფოტო გამოაქვეყნა. ფოტოზე წარწერა დისკრიმინაციული შინაარსის იყო და სექსუალური კავშირის შესახებ ინფორმაციას შეიცავდა.

"სახალხო დამცველი ხშირად საუბრობს, რომ საზოგადოებაში მყარად არის ფესვგადგმული ინფორმაციები გარკვეული ჯგუფების მიმართ, რომელიც ზოგადად თანასწორუფლებიანობის განხორციელებას ხელს უშლის. მოცემულ შემთხვევაში მნიშვნელოვანია შესწავლილი იქნას არის თუ არა სახეზე პირადი ცხოვრების უფლების დარღვევა და შესაბამისი რეაგირება განხორციელდეს, რადგან მსგავსი ჩანაწერები თანასწორობის უფლების განხორციელებას ქვეყანაში ხელს უშლის", - განუცხადა სახალხო დამცველის მოადგილემ ეკა სხილაძემ On.ge-ს.

On.ge-ს შსს-ში განუცხადეს, რომ ჯერჯერობით ამ ფაქტთან დაკავშირებით ინფორმაცია არ აქვთ.