2015 წელს, ბიძინა ივანიშვილი გურია NEWS ინტერვიუში ამბობდა, რომ იმ შემთხვევაში დაბრუნდებოდა, თუ რაიმე საოცრება მოხდებოდა ხელისუფლებაში:

"მე ძალიან კარგი სათადარიგო მოთამაშე ვარ. თუ რაღაც, ღმერთმა დაგვიფაროს და მოხდა ისეთი კატაკლიზმა, სააკაშვილისეული რამე მოიფიქრეს და მოახდინეს უზურპაცია ხელისუფლების და ხალხს აღარ უსმენენ, საზოგადოებას აღარ უსმენენ და დაიწყეს ძალადობა მსგავსი, ასეთ შემთხვევაში შეიძლება მხოლოდ ჩემი დაბრუნება. მადლობა ღმერთს, ამის ნიშნები ჯერჯერობით არ ჩანს".

2015 წელი ირაკლი ღარიბაშვილის პრემიერობის ბოლო წელი იყო. ბიძინა ივანიშვილმა ამავე ინტერვიუში ხაზგასმით აღნიშნა, რომ მისი დაბრუნების არანირი საფუძველი არ არსებობს:

"ჩვენ დღეს გვყავს სახალხო ხელისუფლება და ჩემი აზრით, კარგი პრემიერი, პარლამენტის კარგი თავმჯდომარე და არაფერი იმის მსგავსი არ ისმის, რომ ჩემი პოლიტიკაში მოსვლის აუცილებლობა გახდეს საჭირო".

დღეს, 26 აპრილს, პრემიერმა გიორგი კვირიკაშვილმა განაცხადა, რომ პარტიის დამფუძნებელი, ბიძინა ივანიშვილი ქართული ოცნების თავმჯდომარე გახდება.

ბიძინა ივანიშვილმა ქართული ოცნება 2012 წელს დააფუძნა და პირველი ოქტომბრის საპარლამენტო არჩევნებით, პოლიტიკურმა ძალამ ერთიანი ნაციონალური მოძრაობის მმართველობა ჩაანაცვლა.