პრეზიდენტის საპარლამენტო მდივანმა, ანა ნაცვლიშვლმა განაცხადა, რომ მმართველი პარტია პრობლემებს არ აღიარებს:

"აქვს თვითკმაყოფილების მაღალი ხარისხი, მიუხედავად იმისა, რომ ქვეყნის შიგნით და ქვეყნის გარეთ ძალიან ბევრი აქტორი მთელი რიგი მიმართულებებით უკუსვლაზე საუბრობს", - განაცხადა ნაცვლიშვილმა ნატოს საპარლამენტო ასამბლეის როუზ-როსის შეკრებაზე.

ანა ნაცვლიშვილმა კვოტების კანონპროექტის ჩაგდებაზეც ისაუბრა. მისი თქმით, პარლამენტმა მოქალაქეების, არასამთავრობო ორგანიზაციებისა და ექსპერტების სურვილი უგულებელყო.

"ამ მიმართულებით განსხვავებული აზრის არმოსმენის ნათელი დემონსტრირება იყო ბოლო ცვლილება, რომელიც მედიის საკითხებს ეხებოდა, როდესაც "საზოგადოებრივი მაუწყებლის შესახებ" საკანონმდებლო ცვლილებები გატარდა, მიუხედავად იმისა, რომ ერთ მხარეს იყო მთელი მედიასექტორი, მინუს საზოგადოებრივი მაუწყებელი და რომელსაც პრეზიდენტმა ვეტო დაადო", - განაცხადა ნაცვლიშვილმა.

მისი თქმით, ერთ-ერთი მნიშვნელოვანი გამოწვევაა პოლიტიზირებული სამართალდამცავი სისტემა, რომლის დეპოლიტიზირებაც დღემდე ვერ მოხერხდა.

"სამართალდამცავი სისტემა, ისეთ საქმეებში, როდესაც არსებობს პოლიტიკური კონტექსტი და პოლიტიკური ინტერესი, არ არის პოლიტიკისგან დისტანცირებული ეს მის მოქმედებებს და მის გადაწყვეტილებებს ძალიან ნათლად ემჩნევა", - აღნიშნა ანა ნაცვლიშვილმა.