"მე არ ვიცი რა მიწები არის გაყიდული და რისთვის, ერთი ვიცი, რომ ბაღს ვერავინ ვერ შეეხება", - ამის შესახებ თბილისის მერმა, კახა კალაძემ #109 საბავშვო ბაღის შესახებ განაცხადა.

კალაძემ აღნიშნა, რომ მისთვის შეურაცხმყოფელია ბრალდებები თითქოს, ბაღის დემონტაჟის ნაცვლად გასხვისება იგეგმება.

"ადამიანები ვართ არსებობს მორალი, არსებობს ზნეობა. როგორ უნდა ვიკადროთ ისეთი რამ, რომ ბავშვები გამოვიყვანოთ მოტყუებით და შემდეგ გავასხვისოთ."

კალაძის თქმით, დასკვნაში წერია, რომ შენობა არის ავარიული და ბავშვების ამ შენობაში დატოვება სახიფათოა. მისივე თქმით, მერია ვერ აიღებს ამ პასუხისმგებლობას, სწორედ ამიტომ გადაწყვიტეს ბავშვები სხვადასხვა ბაღში გადაანაწილონ.

ჟურნალისტის კითხვაზე, თუ რატომ ჩაითვალა ავარიულად შენობა, რომელსაც დავით ნარმანიას მერობის დროს ჩაუტარდა რეაბილიტაცია, კალაძემ აღნიშნა, რომ ამის შესახებ ანგარიში არ უნახავს და გადაწყვეტილებას სამხარაულის ექსპერტიზის დასკვნაზე დაყრდნობით მიიღო.

თბილისში, გაბრიელ სალოსის გამზირზე მდებარე #109 ბაღთან მშობლები საპროტესტო აქციას მართავენ.

აქციის მონაწილეები ამბობენ, რომ დასკვნა კონკრეტული პირების პირადი ინტერესებით მომზადდა. ნაწილს მიაჩნია, რომ ბაღის ტერიტორიაზე სასტუმროს კომპლექსის მშენებლობა იგეგმება. ნაწილი კი ფიქრობს, რომ გადაწყვეტილება გვერდით მდგარი მშენებარე კორპუსის გამო მიიღეს.

მშობლები მოითხოვენ ექსპერტიზის დასკვნა გააცნონ. როგორც ისინი აღნიშნავენ, ბაღის დირექტორმა დასკვნა 2018 წლის 16 მარტს მიიღო, თუმცა მათ ამ დრომდე არ აცნობა ბაღის დემონტაჟის შესახებ. მშობლები ამბობენ, რომ თუკი ბაღს სასწრაფო დემონტაჟი სჭირდებოდა სასწავლო პროცესი დასკვნის მიღების შემდეგ, ერთი თვე არ უნდა გაგრძელებულიყო. მათივე თქმით, ბაღი შარშან გაარემონტეს.