თბილისში, გაბრიელ სალოსის გამზირზე მდებარე #109 ბაღთან მშობლები საპროტესტო აქციას მართავენ. ქალაქის მერიის განცხადებით, ექსპერტიზამ დაადგინა, რომ ბაღი ავარიულია და დემონტაჟი სჭირდება. მშობლები არ ეთანხმებიან.

On.ge მშობლების ნაწილს გაესაუბრა და პროტესტის მიზეზები გაარკვია. მათი თქმით, ექსპერტიზის დასკვნის არ სჯერათ. ამბობენ, რომ დასკვნა კონკრეტული პირების პირადი ინტერესებით მომზადდა. ნაწილს მიაჩნია, რომ ბაღის ტერიტორიაზე სასტუმროს კომპლექსის მშენებლობა იგეგმება. ნაწილი კი ფიქრობს, რომ გადაწყვეტილება გვერდით მდგარი მშენებარე კორპუსის გამო მიიღეს.

ფოტო: გიორგი შეყელაძე / On.ge

მშობლები მოითხოვენ ექსპერტიზის დასკვნა გააცნონ. როგორც ისინი აღნიშნავენ, ბაღის დირექტორმა დასკვნა 2018 წლის 16 მარტს მიიღო, თუმცა მათ ამ დრომდე არ აცნობა ბაღის დემონტაჟის შესახებ. მშობლები ამბობენ, რომ თუკი ბაღს სასწრაფო დემონტაჟი სჭირდებოდა სასწავლო პროცესი დასკვნის მიღების შემდეგ, ერთი თვე არ უნდა გაგრძელებულიყო. მათივე თქმით, ბაღი შარშან გაარემონტეს.

მშობლები აპროტესტებენ იმ ფაქტსაც, რომ ბავშვები სხვადასხვა ბაღებში გადაანაწილეს:

"სამი ბავშვი მყავს, სამივე სხვადასხვა ბაღში გადაანაწილეს. არ მაწყობს, არ მინდა. მარტომ როგორ ვატარო სხვადასხვა ბაღში, როცა მშვენიერი ბაღი გვაქვს აქ."

მშობლების ნაწილი ამბობს, რომ ბაღები, რომელშიც ბავშვები გადაამისამართეს გაცილებით უფრო მეტად ავარიულია:

"შენობა არ არის გამყარებული, იქიდან უნდა გადმოჰყავდეთ პირიქით ბავშვები. იქ დასკვნა მიღებულია, რომ მყარია? წვიმა ჩამოდის, ინგრევა ბაღი. ეს ბაღი ათასჯერ უკეთესია, არაფერი ჭირს."

როგორც On.ge-ს აქციის მონაწილეებმა უთხრეს, არ აპირებენ ბაღის ტერიტორია დატოვონ, სანამ მათი მოთხოვნები არ დაკმაყოფილდება. მათ მიაჩნიათ, რომ ბაღიდან მოსწავლეების გაშვება შუა სასწავლო წელს არასწორია და მოითხოვენ მაისის ბოლომდე გადადონ სარემონტო სამუშაოები.

ფოტო: გიორგი შეყელაძე / On.ge

ამასთან დაკავშირებით, ქალაქის მერმა აღნიშნა, რომ ბაღის რეაბილიტაციას არ ექვემდებარება და მისი დემონტაჟია საჭირო. მისივე თქმით, ადგილის გასხვისებაზე საუბარი სიმართლეს არ შეესაბამება:

"ჩვენ, გარდა ამ კონკრეტული ბაღისა, რამდენიმე ბაღში შევაჩერეთ დროებით სწავლება. უახლოეს მომავალში 11 ბაღში სარეაბილიტაციო სამუშაოები ჩატარდება. 5 ბაღი რეაბილიტაციას არ ექვემდებარება და საჭიროა დემონტაჟი, თავიდან ახალი პრეოქტების განხორციელება."

ფოტო: გიორგი შეყელაძე / On.ge

109-ე ბაღთან საპროტესტო აქცია გუშინ, 17 აპრილს, დაიწყო. ღამით აქციის მონაწილეებმა ღამით გზის გადაკეტვა სცადეს, თუმცა პოლიციამ ამის საშუალება არ მისცა, რამაც დაპირისპირება გამოიწვია.

ბაღთან ამ დრომდე პოლიციაა მობილიზებული. მშობლები ტერიტორიის დატოვებას არ აპირებენ.