საჯარო რეესტრის ეროვნულ სააგენტოს ყოფილი თანამშრომელი ქალის სექსუალურად შევწიროებაში დადანაშაულებული პაპუნა უგრეხელიძე სააგენტოს თავმჯდომარის პოსტს ტოვებს. როგორც უგრეხელიძე Facebook-ზე წერს, მან იუსტიციის მინისტრს, თეა წულუკიანს უკვე მიმართა გათავისუფლების მოთხოვნით.

უგრეხელიძე აცხადებს, რომ შანტაჟის და პატივის, ღირსებისა და საქმიანი რეპუტაციის შელახვის მცდელობის საჩივრით სასამართლოს მიმართავს. მისივე თქმით, უნდა დადგინდეს სახალხო დამცველის რეკომენდაციის მართებულობა დაზარალებული ქალისთვის სქესის ნიშნით შევიწროებასა და მისთვის დამამცირებელი სამუშაო გარემოს შექმნაზე:

"ვთავისუფლდები საჯარო მოხელის სტატუსისგან, რომ არ ვიყო განცხადებებში შებოჭილი, თავისუფლად ვილაპარაკო სიმართლე და ვებრძოლო ტყუილს, რომელიც ქალთა უფლებები სახელით ხორციელდება."

პაპუნა უგრეხელიძის განცხადებით, ქალი რეესტრიდან თავისი ქმრის გათავისუფლების გამო იძიებს შურს:

"არც ერთი კანონით დადგენილი მტკიცებულება არც ე.წ. მსხვერპლს და არც სახალხო დამცველს მის მიერ შეთითხნილ დასკვნაში არ წარმოუდგენიათ საზოგადოებისათვის... სახალხო დამცველის კონფიდენციალურ დასკვნაში ვკითხულობთ, რომ ყველა მოწმე კონფიდენციალურია, მტკიცებულებები კონფიდენციალურია... როგორც იურისტი, ვთვლი, რომ ასეთი "დასკვნები" ყველა კაცისა და ყველა ქალის წინააღმდეგ საშიშ ტენდენციას უყრის საფუძველს.

ბოლო პერიოდში საქართველოში ქალები სექსუალური შევიწროებაზე ალაპარაკდნენ. არასამთავრობო ორგანიზაცია სიდას ხელმძღვანელის, ზვიად დევდარიანის შემდეგ, სექსუალურ შევიწროებაში საჯარო რეესტრის ხელმძღვანელი, პაპუნა უგრეხელიძე დაადანაშაულეს.