საჯარო რეესტრის ეროვნული სააგენტოს თავმჯდომარეს, პაპუნა უგრხელიძეს სექსუალურ შევიწროებაში ადანაშაულებენ. ინფორმაციას Imedinews ავრცელებს.

ახალგაზრდა ქალი, რომელმაც Imedinews-თან ანონიმურობის პირობის დაცვით ილაპარაკა აცხადებს, რომ უგრეხელიძე სექსუალური ნიშნით სხვა ქალებსაც ავიწროებდა. დაზარალებულის თქმით, ხანგრძლივი და მტკივნეული პროცესის მიუხედავად, რომლის გავლაც მას მოუწია, დღეს პაპუნა უგრეხელიძე ისევ თანამდებობაზეა, ხოლო იმის გამო, რომ მან თავისი უფლებების დაცვა გაბედა, მის დაჩაგვრას დღემდე ცდილობს.

ტელეკომპანიის ინფორმაციით, სახალხო დამცველის ოფისმა უგრეხელიძეს თანამშრომლის სექსუალური ნიშნით დისკრიმინაცია დაუდგინა. ომბუდსმენის ოფისის დასკვნა 2017 წლის გაზაფხულზე მომზადდა, თუმცა გასაჯაროებული არ არის, ამიტომ სახალხო დამცველის ოფისი საქმის ფიგურანტებს არ ასახელებს.

იმედს ომბუდსმენის სამსახურში დაადასტურეს, რომ დოკუმენტი არსებობს და ამ დოკუმენტის თანახმად დადგენილია მოქალაქის სექსუალური შევიწროების ფაქტი სქესის ნიშნით.

„პრინციპულად მნიშვნელოვანი იყო ჩემთვის სახალხო დამცველის დასკვნა, მაგრამ ეს ხომ მხოლოდ მე არ მეხებოდა. არათუ ბოდიშიც არ მოუხდია არავის, პირიქით ჩემზე ზეწოლა გაგრძელდა. მე იძულებული გავხდი 2016 წელს დამეტოვებინა საჯარო რეესტრი, სადაც მრავალი წელი ვიმუშავე. მაგრამ ის მემუქრებოდა რომ ახალ სამსახურშიც შექმნიდა პრობლემებს", - ამბობს დაზარალებული იმედთან ინტერვიუში.

დაზარალებული ამბობს, რომ 2017 წელს ომბუდსმენის დასკვნის მომზადების შემდეგ მან დოკუმენტი იუსტიციის მინისტრსაც გაუგზავნა, თუმცა ამ ნაბიჯსაც რეაგირება არ მოჰყოლია. მისი ინფორმაციით, მინისტრმა დისკრიმინაცია უმნიშვნელოდ ჩათვალა.

On.ge ცდილობს დაუკავშირდეს ომბუდსმენის აპარატს, საჯარო რეესტრის სააგენტოს და იუსტიციის სამინისტროს. მათ კომენტარს მიღებისთანავე შემოგთავაზებთ.