თიანეთის მერი, თამაზ მეჭიაური ამბობს, რომ სახალხო დამცველს არასრულყოფილი ინფორმაცია აქვს. ასე გამოეხმაურა ომბუდსმენის განცხადებას თიანეთის მერი პოლიტიკური ნიშნით დისკრიმინაციაზე.

თამაზ მეჭიაური ამბობს, რომ სახალხო დამცველმა საკითხი ცალმხრივად შეისწავლა, რადგან მისი პოზიციით არ დაინტერსდა.

"შეშით თიანეთში მარაგდებიან ზაფხულში, უკიდურეს შემთხვევაში სექტემბრამდე მაინც. ყველამ ძალიან კარგად იცის რომ ზამთარი მოვა და არ უნდა დალოდებოდნენ ახალი მერის მოსვლას", - განუცხადა On.ge-ს თიანეთის მერმა და დასძინა, რომ ელექტრო გამათბობლითაც შესაძლებელია გათბობა.

მისი თქმით, სახალხო დამცველი ვის ჩანაწერებსაც დაეყრდნო ისინი იყვნენ ვალდებულები წინა ადგილობრივი ხელისუფლების დროს პრობლემის შესახებ ეცნობებინათ.

თამაზ მეჭიაური ამბობს, რომ ამ ეტაპზე პრობლემა მოგვარებულია. ამ საკითხზე კი მაშინვე დაიწყო მუშაობა, რაც ამ პრობლემის შესახებ მისთვის გახდა ცნობილი.

დღეს, 13 მარტს სახალხო დამცველმა რეკომენდაციით მიმართა თიანეთის მუნიციპალიტეტის მერს, თამაზ მეჭიაურს - აღმოფხვრას მერის წარმომადგენლებისა და სპეციალისტების მიმართ არსებული მძიმე სამუშაო პირობები და დროულად მოამარაგოს ისინი შეშით.