ცხინვალში აცხადებენ, რომ ახალგორის რაიონში ხიდის ქვეშ ხელნაკეთი ასაფეთქებელი მოწყობილება იპოვეს. როგორც ოსური სააგენტო დე ფაქტო ხელისუფლების ინფორმაციისა და ბეჭდვის სახელმწიფო კომიტეტის თავმჯდომარე მარია კოტაევაზე დაყრდნობით იუწყება, მოწყობილობა ადგილობრივმა მოსახლეობამ აღმოაჩინა.

ოსური მხარე მოწყობილობას არჩილ ტატუნაშვილს უკავშირებს და აცხადებს, რომ ის რუსეთის საპრეზიდენტო არჩევნების წინ პროვოკაციებს გეგმავდა.

"ეს არის კიდევ ერთი მტკიცებულება იმ უკანონო ქმედებისა, რომელიც ის რესპუბლიკის ტერიტორიაზე გეგმავდა", - განაცხადა კოტაევამ. მისივე თქმით, სამხრეთ ოსეთის დე ფაქტო რესპუბლიკის მთელ ტერიტორიაზე უსაფრთხოების ზომები გამკაცრებულია.

22 თებერვალს ცხინვალის ციხეში საქართველოს მოქალაქე გარდაიცვალა. ოსური მხარის ვერსიით, არჩილ ტატუნაშვილმა იზოლატორში გადაყვანისას პოლიციელისთვის იარაღის წართმევა სცადა, საპასუხო ძალის გამოყენების შედეგად შეუძლოდ გახდა, კიბეებზე წაიქცა და მოგვიანებით საავადმყოფოში დაიღუპა.

სახელმწიფო უსაფრთხოების სამსახურის ინფორმაციით, ოსური მხარე აცხადებს, რომ ტატუნაშვილი ინფარქტით დაიღუპა და მისი ცხედრის ექსპერტიზაზე უარს ამბობს. გარდაცვლილის ცხედარი ოკუპირებულ ცხინვალს 24 თებერვალს უნდა გადმოესვენა, თუმცა დე ფაქტო ხელისუფლებამ პოზიცია შეცვალა.

ახალგორში არჩილ ტატუნაშვილთან ერთად დაკავებული იყო საქართველოს კიდევ ორი მოქალაქე. სუს-ის ცნობით, ლევან ქუტაშვილი და იოსებ პავლიაშვილი ცხინვალის ციხიდან ახალგორის ციხეში უკვე გადაიყვანეს. ოსური მხარე მათ გათავისუფლებაზე უარს ამბობს.

ქართულმა მხარემ ერგნეთის მოლაპარაკებების 1-ლი მარტის შეხვედრა პროტესტის ნიშნად დატოვა.