დე ფაქტო სამხრეთ ოსეთის ხელისუფლება აცხადებს, რომ ცხინვალში დაკავებული საქართველოს მოქალაქის, არჩილ ტატუნაშვილის გარდაცვალების პირველადი მიზეზი გულის შეტევაა. ამის შესახებ ინფორმაციას საქართველოს სახელმწიფო უსაფრთხოების სამსახური ავრცელებს.

უწყების ცნობით, მათ ე.წ. ცხელი ხაზის მექანიზმი აამოქმედეს და ცხინვალში ტატუნაშვილის ცხედრის პირველადი შესწავლის მიზნით სამხარაულის ექსპერტიზის ეროვნული ბიუროს წარმომადგელების შეშვება მოითხოვა, თუმცა დე ფაქტო ხელისუფლებისგან უარი მიიღო.

სუსი მოითხოვს არჩილ ტატუნაშვილის ცხედრის გადმოსვენებას და დაკავებულების, ლევან ქუტაშვილის და იოსებ პავლიაშვილის უმოკლეს ვადაში გათავისუფლებას.

სუსი, ასევე, აცხადებს, რომ ტყუილია, თითქოს არჩილ ტატუნაშვილი ქართულ სპეცსამსახურებთან თანამშრომლობდა და მონაწილეობდა "ოსების გენოციდში".

უწყების ინფორმაციით, 2018 წლის პირველ მარტს ჩანიშნულია ინციდენტების პრევენციისა და მათზე რეაგირების მექანიზმის (IPRM) მორიგი შეხვედრა სოფელ ერგნეთში და აღნიშნულ საკითხს ქართული მხარე დღის წესრიგში დააყენებს:

"მომხდარ ფაქტთან დაკავშირებით, საჭიროა, საერთაშორისო თანამეგობრობის ყურადღების მაქსიმალური მობილიზება, რათა მოხდეს ტატუნაშვილის გარდაცვალების მიზეზის სიღრმისეული და გამჭვირვალე გამოძიება. ამ მიმართულებით სახელმწიფო უსაფრთხოების სამსახური აგრძელებს მის ხელთ არსებული ყველა სახის ინფორმაციის მყისიერ მიწოდებას, როგორც საქართველოს ხელისუფლების სხვადასხვა უწყების, ისე საერთაშორისო ორგანიზაციებისთვის."

22 თებერვალს ცხინვალის რეგიონში, ციხეში საქართველოს მოქალაქე გარდაიცვალა. ოსური მხარის განცხადებით, არჩილ ტატუნაშვილმა ცხინვალში, იზოლატორში გადაყვანისას პოლიციელისთვის იარაღის წართმევა სცადა, საპასუხო ძალის გამოყენების შედეგად შეუძლოდ გახდა, კიბეებზე წაიქცა და მოგვიანებით საავადმყოფოში დაიღუპა.

საქართველოს საგარეო საქმეთა სამინისტრო ტატუნაშვილის გარდაცვალებაზე პასუხისმგებლობას რუსეთის საოკუპაციო რეჟიმის წარმომადგენლებს აკისრებს.