საქართველოს პარლამენტის წევრი პატრიოტთა ალიანსიდან, ნატო ჩხეიძე, რომელიც ტელეკომპანია იბერიას მფლობელების დედაა ამბობს, რომ არხზე პოლიტიკური ზეწოლა არაა. განსხვავებული ინფორმაცია გაავრცელა გუშინ, 20 თებერვალს ტელეკომპანიის საინფორმაციო სამსახურის უფროსმა.

"შანტაჟი საერთოდ დაუშვებელია ყველას მხრიდან. მხოლოდ ის შემიძლია ვთქვა, რომ რასაც ვუყურებ ეს ტელეკომპანია იბერიაც და სხვა ტელეკომპანიებიც არიან დამოუკიდებლები და მე რასაც ვხედავ, არანაირი პოლიტიკური თუ ეკონომიკური ზემოქმედებისთვის არ არიან გამოყენებული", - განმარტა დეპუტატმა, რუსთავი 2-სთვის მიცემულ ინტერვიუში.

დეპუტატს რამდენიმე თვის წინ ქმართან, ზაზა ოქუაშვილთან ერთად ეკუთვნოდა ტელეკომპანია იბერიას 100-პროცენტიან წილი, მოგვიანებით კი თავიანთ შვილებს აჩუქეს. ოქუაშვილი იმ კომპანიის მფლობელია, რომელზე ფინანსურ ზეწოლაზეც იბერიას საინფორმაციო სამსახურის უფროსმა ისაუბრა.

ტელეკომპანია იბერიას საინფორმაციო სამსახურის ხელმძღვანელმა, ვახო ხუზმიაშვილმა განაცხადა, რომ ტელეკომპანიის მთავარი დამფინანსებელი ომეგა ჯგუფი ფინანსური დარტყმის ქვეშ აღმოჩნდა, რაც სერიოზულ ფინანსურ პრობლემებს უჩენს იბერიასაც.

"არხზე მომუშავე ჟურნალისტები ვვარაუდობთ, რომ ეს ხდება მიზანმიმართულად იმისთვის, რომ ტელეკომპანიამ ვეღარ გააგრძელოს მაუწყებლობა თავისუფალი სარედაქციო პოლიტიკით. ტელეკომპანია იბერია არის ტელევიზია, რომელიც ყველა ხელისუფლების პირობებში ხდება მიუღებელი და დევნის ობიექტი დამოუკიდებელი სარედაქციო პოლიტიკის გამო. ჩვენ, ჟურნალისტები მოვუწოდებთ ხელისუფლებას აღკვეთოს ომეგა ჯგუფის წინააღმდეგ მიმართული უკანონო ქმედებები", - თქვა ხუზმიაშვილმა.

განახლება: ჩხეიძემ ამ განცხადებიდან რამდენიმე საათში აღნიშნა, რომ ტელეკომპანიის თანამშრომლებმა უფრო ადრე გაანალიზეს არსებული ვითარება: "როგორც ჩანს ტელეკომპანიის ჟურნალისტებმა გაიაზრეს, გააანალიზეს ის ვითარება, რაც შექმნილია და როგორც ჩანს ჟურნალისტებმა უფრო სწრაფად და სწორად გააანალიზეს თუ სხვებმა არა და გამოიტანეს ის დასკვნა, რაც გამოიტანეს და რაც თქვენს და მეც მოვისმინეთ".