საქართველოს პარლამენტის თავმჯდომარე, ირაკლი კობახიძე ამბობს, რომ საზოგადოებრივ მაუწყებელზე ცვლილებების დაწყებისთანავე არხზე დაიწყო პოლიტიკური შტურმი. ასე შეაფასა პარლამენტის თავმჯდომარემ არხზე მიმდინარე ცვლილებებზე გამოთქმული კრიტიკული მოსაზრებები პარლამენტში მედიასთან და არასამთავრობო ორგანიზაციებთან შეხვედრაზე.

"ჯერ დაიწყო გადაცემების ასე ვთქვათ, გაუქმების წინააღმდეგ პროტესტით, მაშინ, როდესაც ზუსტად ის გადაცემები ქმნიდა ნულოვან რეიტინგს. ეს ხომ პრობლემა იყო, ამას ყველა ვხედავდით. დაიწყო ცვლილებებზე საუბარი, მაშინვე დაიწყო პოლიტიკური შტურმი", - თქვა კობახიძემ, რომელსაც მიაჩნია, რომ კრიტიკის ობიექტური მიზეზები არ არსებობს.

მისი თქმით, მაუწყებლის მიმართ კრიტიკის მიზეზი გახდა მიმდინარე კანონპროექტიც, რომელის ვეტოს დაძლევაზეც ახლა პარლამენტი მსჯელობს.

"თუ რამეს გააუმჯობესებს მენეჯმენტი, თორემ გაუარესებით რა უნდა გააუარესო, ხომ? ვერანაირად ნულოვან სოციალურ გავლენას ვერ დაიყვან მინუს სოციალურ გავლენად. ეს არის რეალური ვითარება", - თქვა კობახიძემ.

კობახიძეს არ გაახსენდა საზოგადოებრივი მაუწყებლის შენობასთან გადაცემა "წითელი ზონის" დახურვის გადაწყვეტილების გამო გამართული აქციები და აღნიშნა, რომ ამავე არხზე "მსგავსი რეიტინგის" მქონე გადაცემების დახურვაზე პროტესტი არავის გამოუთქვამს.