საქართველოს მესამე პრეზიდენტსა და უკრაინის ოპოზიციის ერთ-ერთ ლიდერს მიხეილ სააკაშვილს კიევის სააპელაციო სასამართლომ შინაპატიმრობა მიუსაჯა. მოსამართლემ გადაწყვეტილება დღეს, 26 იანვარს გამოაცხადა. სასამართლომ მისთვის აღკვეთის ღონისძიების შეფარდების შესახებ გენერალური პროკურატურის საჩივარი განიხილა.

მოსამართლის განცხადებით, საღამოს 22 საათიდან დილის 7 საათამდე საქართველოს მესამე პრეზიდენტს გადაადგილება ეკრძალება.

სააკაშვილს ასევე დაევალა დამატებითი პროცესუალური მოვალეობები, კონკრეტულად მოთხოვნის შემთხვევაში უნდა გამოცხადდეს პროკურორთან, გამომძიებელთან ან სასამართლოში. ასევე, პროკურორის ნებართვის გარეშე არ აქვს კიევის დატოვების უფლება.

გადაწყვეტილების გამოცხადების პროცესში სააკაშვილმა და მისმა მომხრეებმა დარბაზში ხმაური ატეხეს, მოსამართლემ ვერ შეძლო სრულად წაეკითხა ტექსტი და უცნობია ყველა ის ვალდებულება, რაც დაეკისრა ბრალდებულს.

გადაწყვეტილების გამოცხადების შემდეგ მიხეილ სააკაშვილმა დარბაზში დამსწრეებს განუცხადა, რომ ის იღებს პეტრო პოროშენკოს გამოწვევას და ხვალიდან მარშს აანონსებს, პრეზიდენტის გადადგომის მოთხოვნით.

მანამდე, კიევის პეჩორის სასამართლომ ამ საქმეში მიხეილ სააკაშვილი გაამართლა და ეს გადაწყვეტილება პროკურატურამ მეორე ინსტანციაში გაასაჩივრა.