გერმანიის დაზვერვის სამსახურმა ISIS-ის დოკუმენტები მოიპოვა, რომლის შედეგადაც 22 ათასი ჯიჰადისტის იდენტიფიცირება მოხდა.

23 შეკითხვიანი კითხვარი, რომელსაც მოხალისეებს ტერორისტულ ორგანიზაციაში ავსებინებენ, მებრძოლების სახელებს, გვარებს, მისამართებს, ტელეფონის ნომრებს, სისხლის ჯგუფსა და სხვა ინფორმაციას შეიცავს.

მასალის დამუშავების შედეგად იდენტიფიცირებულია რამდენიმე ამერიკელი, ბრიტანელი, ფრანგი და გერმანელი ჯიჰადისტი.

გერმანიის შინაგან საქმეთა მინისტრის, ტომას დე მაზიერის თქმით, აღნიშნული ინფორმაცია ევროპელ სამართალდამცავებს სირიიდან და ერაყიდან დაბრუნებული მებრძოლების დაკავებასა და გასამართლებას გაუადვილებს.

გერმანული მედიის ცნობით, კითხვარში მოხალისეებს ეკითხებიან აქვთ თუ არა ჯიჰადის გამოცდილება და მზად არიან თუ არა გახდნენ თვითმკვლელი ტერორისტები.

დაზვერვის მიერ მოპოვებული დოკუმენტები 2013 წლით თარიღდება. ძალოვნების განცხადებით, ინფორმაციის საშუალებით ათასამდე აქამდე უცნობი ჯიჰადისტის ვინაობა დადგინდა.