ერთიანი ნაციონალური მოძრაობის ხელისუფლებაში ყოფნის დროს საქართველოს ყოფილი მინისტრი, ბაჩო ახალაია ტელეკომპანია რუსთავი 2-სთვის მიცემულ ინტერვიუში ამბობს, რომ ე.წ. კასრების ჩანაწერებით ცნობილი ვიდეოები ფალსიფიცირებულია.

"საფუძვლიანი ეჭვი მაქვს, რომ თვითონ როგორც ამბობენ, კარების საქმე თავიდან ბოლომდე ფალსიფიცირებული მგონია. როგორ, რანაირად არ ვიცი, მაგრამ ზუსტად შემიძლია გითხრათ, რომ ასეთი მოვლენა, ასეთი სიგიჟე ფალსიფიცირებულია", - განცხადა ახალაიამ.

კითხვაზე - საიდან გაჩნდა ჩანაწერები - ახალაიამ თქვა, რომ შინაგან საქმეთა და თავდაცვის სამინისტროებში მსგავსი არქივი არ კეთდებოდა.

"შეიძლება არსებობდა რაღაც. ჩვეულებრივად, ახლაც მიმდინარეობს ოპერატიული საქმიანობა. იქ ვინმეს რამე გადაცდომა თუ ჰქონდა ეს არის ყველა კონკრეტული გამოსაძიებელი და არა ასეთი მითების შესაქმნელი. ტექნიკურად ქართულ სახელმწიფოს იმ დროს, როცა ჩვენ ხელისუფლებაში გვქონდა წვდომა, არ გვქონდა მასიურად მოსმენების და სიგიჟეების საშუალებები", - აღნიშნა ახალაიამ და დასძინა, რომ ხელისუფლება სანამ არ შეიცვლება სიმართლე არ დადგინდება.