ერთიანი ნაციონალური მოძრაობის წევრს, დავით ბაქრაძეს მიაჩნია, რომ რუსთავი 2-ის დაკვეთით GfK-ს მიერ ჩატარებული კვლევის შედეგები, რომლის თანახმადაც გამოკითხულთა 30,5% ქართულ ოცნებას, 28,2% კი ნაციონალურ მოძრაობას უჭერს მხარს, არის ძალიან დიდი ნდობისა და ამავე დროს ენმ-სთვის პასუხისმგებლობის საფუძველი:

"რა თქმა უნდა, როგორც ამ პასუხისმგებლობის მქონე პოლიტიკოსი, მე ყველანაირად ვეცდები, სადაც არ უდნა ვიყო პოლიტიკაში, გავაკეთო ყველაფერი, რაც შემიძლია იმისთვის, რომ ქვეყანა მიდიოდეს წინ, ხალხი ცხოვრობდეს უკეთ".

წინასაარჩევნო გამოკითხვაში მონაწილეობა მიიღო საქართველოს 2,200-მა სრულწლოვანმა მოქალაქემ.

კვლევა პირდაპირი გამოკითხვის გზით, 2016 წლის 7 ივნისიდან 22 ივნისამდე, ჩატარდა.

კვლევა GfK-ს რუსთავი 2-მა დაუკვეთა. ტელეკომპანიის გენერალური დირექტორის ნიკა გვარამიას თქმით, აღნიშნული ორგანიზაცია "უპრეცედენტო სიზუსტითა" და "უმაღლესი სტანდარტით" გამოირჩევა.

რუსთავი 2-ის ინფორმაციით, გამოკითხულთა შერჩევა ემყარებოდა შემთხვევითობის პრინციპს და ცდომილების ზღვარი შეადგენს პლუს ან მინუს 2.1 პროცენტს. გამოკითხულთა 77 % დათანხმდა ინტერვიუზე და კითხვარის შევსებაზე.