საქართველოს კალათბურთის ეროვნულმა ფედერაციამ შემაჯამებელი ღონისძიება გამართა. შეხვედრაზე განიხილეს ყველა არსებული გამოწვევა, რომლის წინაშეც ფედერაცია დგას, ასევე სხვადასხვა ასაკობრივი და სქესობრივი ჯგუფის ნაკრებთა მონაწილეობა და წარმატებები ტურნირებსა და ჩემპიონატებში.

შეხვედრაზე ფედერაციამ "წლის წიგნი" წარადგინა. მასში ასახულია ყველა ის საკალათბურთო ღონისძიება, რომელიც ბოლო 4 წლის განმავლობაში ჩატარდა. წიგნს თან ახლავს დისკი, რომელზეც თავმოყრილია აქამდე გამოცემული 6 წიგნი და სხვადასხვა ღონისძიებების ვიდეომასალა, მაგ.: ყველა ვარსკვლავის მატჩი, Junior NBA-Gbr ლიგა და სასკი ბასკონიას კემპი.

შეხვედრაზე დამსწრე საზოგადოებამ მოისმინა ვიდეო-მესიჯები, რომლებიც ფედერაციას მსოფლიო მასშტაბით საკალათბურთო საზოგადოების მნიშვნელოვანმა პირებმა გამოუგზავნეს: ფიბა-ევროპის გენერალურმა მდივანმა კამილ ნოვაკმა, საქართველოს ეროვნული ნაკრების ყოფილმა მთავარმა მწვრთნელმა იგორ კოკოშკოვმა, „სასკი ბასკონიას“ გენერალურმა დირექტორმა ხესუს ვასკესმ, ჯუნიორ ნბა-ს ხელმძღვანელებმა ნილ მეიერმა და ვანია ჩერნივეცმა.

პრეზენტაციის დასასრულს კალათბურთის ფედერაციის მოქმედმა პრეზიდენტმა, მიხეილ გაბრიჩიძემ საზოგადოებას ამცნო რომ ფედერაციის საპრეზიდენტო არჩევნებში მონაწილეობას არ მიიღებს.

შეხვედრას ესწრებოდნენ ეროვნული ნაკრების წევრები და მწვრთნელები, რეგიონალური ფედერაციის ხელმძღვანელები და სხვა მოწვეული სტუმრები. პრეზენტაციის დასკვნით ნაწილში სამადლობელო პრიზებით დაჯილდოვდნენ საქართველოს კალათბურთის ეროვნული ფედერაციის სპონსორები და პარტნიორები.

ფოტო: ფოტო: თამუნა გეგიძე

ფოტო: ფოტო: თამუნა გეგიძე

ფოტო: ფოტო: თამუნა გეგიძე

ფოტო: ფოტო: თამუნა გეგიძე