გუშინ ინგლისის სამეფო ოჯახმა ოფიციალურად განაცხადა, რომ ინგლისის პრინცი ჰარი მის ამერიკელ შეყვარებულზე, მსახიობ მეგან მარკლზე ქორწინდება.

განცხადებიდან რამდენიმე საათში მათი პირველი ინტერვიუ ერთდროულად რამდენიმე არხზე გავიდა, მათ შორის BBC-სა და CNN-ზე, სადაც წყვილი ნიშნობის დეტალებზე საუბრობდა.

"ტიპური, ჩვეულებრივი და მყუდრო საღამო იყო. ქათამს ვამზადებდით ვახშმისთვის და უცებ ასეთი სიურპრიზი მომიწყო, ძალიან საყვარლად, ბუნებრივად და რომანტიკულად გამოუვიდა. დაიჩოქა და მკითხა გავხდებოდი თუ არა მისი ცოლი", - ამბობს მეგან მარკლი.

ისტორიის მოყოლად კი ჰარი აგრძელებს:

"წინადადების დასრულება არც კი დამაცადა, ინსტიქტურად მიპასუხა, რომ თანახმა იყო. შემდეგ ერთმანეთს ჩავეხუტეთ, მას თითზე ჩემი მიცემული ბეჭედი ეკეთა. მხოლოდ ჩვენ ორნი ვიყავით და ეს არაჩვეულებრვი იყო", - ამბობს ინგლისის პრინცი.

მეგანმა და ჰარიმ პრინცესა დაიანაზეც ისაუბრეს.

"ვფიქრობდი, რას იტყოდა დედა ამ ყველაფერზე, რას იფიქრებდა, რას იგრძნობდა და რა ემოციები ექნებოდა. დარწმუნებული ვარ, რომ მეგანი და დედაჩემი საუკეთესო მეგობრები იქნებოდნენ. ასეთ დღეებში პირველი სწორედ მასზე ვფიქრობ, რადგანაც საოცრად მინდა სიახლეები გავუზიარო. მისთვის ყველაზე მთავარი ჩემი ბედნიერება იყო და მჯერა, რომ ის ახლა ყველაზე ბედნიერი იქნებოდა. უფრო სწორად ის ახლაც ბედნიერია, იმიტომ რომ მუდმივად ჩემთანაა, ჩემს გულსა და გონებაში", - ამბობს პრინცი ჰარი.

როგორც ცნობილია, პრინცი ჰარი და მეგან მერკლი 2018 წლის გაზაფხულზე დაქორწინდებიან. წყვილი კენსიგტონის სასახლის ნოტინგჰემის კოტეჯში იცხოვრებს.