სახელმწიფო დეპარტამენტის გადაწყვეტილებით, შესაძლოა, აშშ-მ საქართველოს ჯაველინის ტიპის ტანკსაწინააღმდეგო სარაკეტო სისტემა მიყიდოს, რომლის ღირებულებაც 75 მილიონი დოლარია.

აშშ-ს თავდაცვისა და უსაფრთხოების სააგენტოს ცნობით, მათ 17 ნოემბერს გასცეს დოკუმენტი, რომლის მიხედვით, კონგრესს სარაკეტო სისტემის შესაძლო გაყიდვის შესახებ აცნობეს.

სააგენტო წერს, რომ საქართველოს მთავრობამ 410 რაკეტის, 72 ბლოკი სამიზნე და გამშვები მოწყობილობის, 10 სასწავლო კომპლექსისა და 70 ჭურვის შესყიდვის სურვილი გამოთქვა.

"შეთავაზებული შესყიდვა, საქართველოს უსაფრთხოების გაზრდით, ხელს შეუწყობს აშშ-ს საგარეო პოლიტიკასა და ეროვნულ უსაფრთხოებას. Javelin-ის სისტემა საქართველოს ეროვნული თავდაცვის საჭიროებებს პასუხობს", - ნათქვამია სახელმწიფო დეპარტამენტის მიერ გავრცელებულ განცხადებაში.

თავდაცვის მინისტრის მოადგილის, ლელა ჩიქოვანის თქმით, ჯავშანსაწინააღმდეგო სისტემები მხოლოდ თავდაცვისუნარიანობის განმტკიცებისთვისაა და ვერ გამოიყენება ვერცერთი ქვეყნის წინააღმდეგ.

საგარეო საქმეთა მინისტრის მოადგილე, დავით ზალკალიანი სახელმწიფო დეპარტამენტის გადაწყვეტილების შეფასებისას აღნიშნავს, რომ ეს ორი სუვერენული სახელმწიფოს პარტნიორობას გამოხატავს.

სახელმწიფო დეპარტამენტის ცნობით, პოტენციურ კონტრაქტზე განცხადება კანონით არის განსაზღვრული და არ გულისხმობს, რომ ეს შეთანხმება აუცილებლად განხორციელდება.