ამერიკული ავიაკომპანია დელტას თვითმფრინავში, რომელიც ლოს-ანჯელესი-დეტროიტის რეისს ასრულებდა, მგზავრებმა გამოიჭირეს წყვილი, რომელიც ორალური სექსით იყო დაკავებული. ინფორმაცია ამის შესახებ დეტროიტის უმსხვილესმა მედიასაშუალება Detroit Free Press-მა პოლიციიდან მოპოვებულ დოკუმენტებზე დაყრდნობით გაავრცელა.

მედიასაშუალების ცნობით, შემთხვევა 29 ოქტომბერს მოხდა. ერთ-ერთმა მგზავრმა შენიშნა, რომ მისი რიგის გასწვრივ ქალს კაცის კალთაში თავი ჰქონდა ჩარგული, თავზე დაფარებული პლედი კი აქტს ბოლომდე ვერ ფარავდა.

"მე შევწუხდი კაცის გამო, რომელიც ამ წყვილის გვერდით იჯდა და ეძინა", - განუცხადა თვითმხილველმა პოლიციას.

როგორც კი თვითმფრინავი დეტროიტის აეროპორტში დაეშვა, გამოჩნდა პოლიცია. ასევე გამოუძახეს გამოძიების ფედერალურ ბიუროსაც (FBI).

პოლიციამ გაარკვია, რომ 26 წლის კაცი და 48 წლის ქალი ერთმანეთს არ იცნობდნენ. ისინი პირველად სწორედ ამავე რეისზე შეხვდნენ. გარდა ამისა, ქალი სხვა რიგში იჯდა, თუმცა ადგილი გადაუცვალა სხვას, რათა კაცის გვერდით აღმოჩენილიყო. როგორც პოლიციის ანგარიშშია აღნიშნული, ქალი, სავარაუდოდ, მთვრალი იყო და ის სამართალდამცავებს უყვიროდა. რაც შეეხება კაცს, მან ბოდიში მოიხადა და თქვა, რომ ქალს, უბრალოდ, მის ფეხებზე ჩაეძინა, თავად კი მას მხოლოდ ძუძუზე შეეხო გარედან.

სამართალდამცავებმა წყვილი თვითმფრინავიდან ხელბორკილით გაიყვანეს, თუმცა მათ წინააღმდეგ სისხლის სამართლებრივი დევნა არ დაუწყიათ და რამდენიმე საათში გაათავისუფლეს. გამოძიების ფედერალურმა ბიურომ ისინი მხოლოდ გააფრთხილა "უხამსი და გარყვნილი" ქმედებისთვის.

ინციდენტში მონაწილე კაცმა, დეტროიტიდან საბოლოო დანიშნულებამდე, გზა უპრობლემოდ გააგრძელა. რაც შეეხება ქალს, მას ავიაკომპანია დელტამ მომსახურებაზე უარი უთხრა, თუმცა დეტროიტის დატოვება მანაც შეძლო.