თბილისის მერმა დავით ნარმანიამ თბილისის მთავრობის ბოლო სხდომაზე სამწლიანი მუშაობის შედეგები შეაჯამა. ნარმანიას თქმით, მისი მერობის პერიოდში 700 ათასზე მეტი ხე დაირგა.

მერის განცხადებით, სამი წლის განმავლობაში მოეწყო 196 ახალი სკვერი და რეაბილიტაცია ჩაუტარდა 463-ს. მისი განცხადებით, 13 ივნისის სტიქიის შედეგების სალიკვიდაციოდ, სხვადასხვა სახის სამუშაოებზე, ჯამში 90 მილიონი ლარი დაიხარჯა. მერის ინფორმაციით, ექსპლუატაციაში შევიდა 12 ახალი საბავშვო ბაგა-ბაღი და 13-ის მშენებლობა მიმდინარეობს.

"გარდა ამისა კი წინა ხელისუფლების პირობებში სხვადასხვა მიზეზით დახურული 3 ბაღი გავხსენით, გავარემონტეთ 100 არსებული ბაღიც, რამაც შესაძლებლობა მოგვცა მიგვეღო კიდევ უფრო მეტი აღსაზრდელი", - განაცხადა დავით ნარმანიამ.

მან, ასევე, აღნიშნა, რომ ჯანდაცვისა და სოციალური მომსახურების საქალაქო სამსახურმა 10 ახალი პროგრამა განახორციელა. ნარმანიას თქმით, სოციალური პროგრამების უმეტესობის დაფინანსება გაიზარდა, ნაწილი კი გაორმაგდა.

"აღნიშნულ პერიოდში თბილისის მერიის მიერ სწავლა დაუფინანსდა 6 500-მდე სოციალურად დაუცველ სტუდენტს, ასევე, სტიპენდიით წავახალისეთ მაღალი აკადემიური მოსწრების 369 მაგისტრანტი. პროფესიული უნარების გაუმჯობესებისა და დასაქმების ხელშეწყობისათვის კი გადამზადდა 700 ადამიანი. გაიხსნა ფონიჭალის ახალგაზრდული ცენტრი და ქალაქს შევმატეთ კიდევ ერთი ახალი მედიათეკა ვეტერანთა კულტურის და დასვენების პარკში", - განაცხადა დავით ნარმანიამ.

დავით ნარმანია თბილისის მერად სამწლიანი ვადით 2014 წელს აირჩიეს. ადგილობრივი თვითმმართველობის არჩევნების შედეგად 12 ნოემბერს მას კახა კალაძე ჩაანაცვლებს.