ტენდერში გამარჯვების შემდეგ საქართველოს ყოფილი პრემიერ-მინისტრისა და მმართველი პარტიის დამფუძნებლის შვილი, ბერა ივანიშვილი თავისი კომპანიის ტექნიკას საზოგადოებრივ მაუწყებელს ჩუქნის. გადაწყვეტილების შესახებ ბერამ საკუთრა ოფიციალურ ფეისბუკგვერდზე დაწერა.

"ამ დღეებში გარკვეული აჟიოტაჟი მოჰყვა პირველი არხის მიერ GDS-ის კუთვნილი აპარატურის ქირავნობას და როგორც ასეთ შემთხვევაში ხდება, ცალკეულმა ადამიანებმა სცადეს ამ ფაქტით სპეკულირება. საქმის არსი გახლავთ ის, რომ მას შემდეგ რაც ჯიდიესი შეიძინა ტელეკომპანია იმედმა, ტექნიკის გარკვეული ნაწილი, რომელიც კინოგადაღებებისთვის გამოიყენებოდა, ნასყიდობის ხელშეკრულების მიღმა დარჩა. ჩემთვის ამ ტექნიკის შესახებ არაფერი იყო ცნობილი და მის შესახებ სწორედ ამ აჟიოტაჟის წყალობით შევიტყვე. მე არც ტენდერის შესახებ ვიცოდი და ცხადია, რომ ამით მატერიალური სარგებლის მიღება ჩემს მიზანს არ წარმოადგენდა. და ბოლოს, რადგან აღმოჩნდა, რომ არსებობს ტექნიკა, რომელიც არ სჭირდება ჩემს სტუდიას, სამაგიეროდ სჭირდება პირველ არხს, მინდა, რომ ეს ტექნიკაც და ყველა სხვა აპარატურა, რომელიც ჩვენს განკარგულებაშია და არ სჭირდება კინოსტუდიას, საჩუქრად გადავცე პირველ არხს", - წერს ბერა.

რამდენიმე დღის წინ, საზოგადოებრივმა მაუწყებელმა ბერას ყოფილი კომპანიის, ტელეკომპანია GDS-ის ყოფილი წამყვანის, მაკა ცინცაძის სტუდიის განათების მომსახურების ტენდერში გამარჯვებულად სილქ ფაქტორი სტუდიო გამოავლინა. კომპანიას გადაცემის სტუდია 346 098 ლარად 9 თვის განმავლობაში უნდა გაენათებინა. კომპანიის 100 პროცენტიანი წილის მფლობელი ბერაა.