საქართველოს პარლამენტის დეპუტატი ქართული ოცნებიდან, ზაქარია ქუცნაშვილი ამბობს, რომ პარტიაში რეკომენდაცია თამაზ მეჭიაურის გარდა სხვა ბევრ პირს გაუწია. ამის შესახებ ქუცნაშვილი On.ge-ს ესაუბრა.

დეპუტატი თავს იკავებს კონკრეტული პირების ვინაობის დასახელებისგან, რადგან მიაჩნია, რომ არაკორექტული იქნება. ქუცნაშვილის თქმით, მისი მოლოდინები "ძალიან ბევრმა გაამართლა".

"ვინც [თამაზ მეჭიაური] არ გაამართლა, გითხარით უკვე", - დასძენს დეპუტატი და აღნიშნავს, რომ პარტიის დაკომპლექტებაში მისი კოლეგებიც ჩართულები არიან.

რამდენიმე დღის წინ, ზაქარია ქუცნაშვილმა რუსთავი 2-ზე, გადაცემა არჩევანში, თამაზ მეჭიაურის თანამდებობაზე დანიშვნის ისტორია გაიხსენა. მისი თქმით, მიუხედავად იმისა, რომ მეჭიაურს "კორუმპირებული ჩინოვნიკისა" და "არასტაბილურის" იმიჯი ჰქონდა, პარტიაში ნათესაური კავშირის გამო დაასაქმა.