საზოგადოებრივი მაუწყებლის სამეურვეო საბჭო "პირველი არხის" ეთერში სიმღერის დროს 10 წლის ბავშვის წაქცევის ფაქტთან დაკავშირებით შეხვედრას მართავს, სადაც სამეურვეო საბჭოს წევრები და შუადღის ეთერის თანამშრომლები არიან შეკრებილი და დეტალურად იხსენებენ "სიმღერის აკადემიის" მუსიკალური ნომრის ჩაწერის ეპიზოდს.

საზოგადოებრივი მაუწყებლის გადაცემის მიმდინარეობაზე პასუხისმგებელმა პირი, სალომე გოგინაშვილი აცხადებს, რომ ბავშვის წაქცევის მომენტი საეთეროში ფიზიკურად არავის დაუნახავს და ამის თეორიული შანსიც არ არსებობდა.

სალომე გოგინაშვილისთვის ბრალდებები, თითქოს მან ბავშვის ჯანმრთელობაზე წინ ტელევიზია დააყენა, გაუგებარია.

"ორი შვილი მყავს, ზუსტად ანკას ხელა. მას შემდეგ, რაც მე გავიგე, რომ ეს ბავშვი ცუდად გახდა, პირველ რიგში ჩემი შვილები წარმოვიდგინე ანკას დედის ადგილას და ანკას ადგილას ჩემი ორი შვილი.

ბრალდება, რომ მე დავინახე ჩემი შვილის ხელა ბავშვი როგორ ეცემა და მე არა თუ ეთერი, მთელი მთელი ტელევიზია დავაყენე ბავშვის ჯანმრთელობაზე წინ, არ მესმის. აი, კიდევ ერთხელ ვამბობ სრული პასუხისმგებლობით და ეს შემიძლია გავიმეორო ყველგან", — განაცხადა გოგინაშვილმა.

სალომე გოგინაშვილმა ტექნიკური დეტალებიც განმარტა და აღნიშნა, რომ ეჭვების გასაფანტად ვიდეოჩანაწერი ბევრჯერ გადაახვია. მისივე თქმით, სოციალურ ქსელში გავრცელებული ვერსიები, თითქოს პირდაპირი ეთერის ჩანაწერი შეგნებულად დამონტაჟდა, სიმართლეს არ შეესაბამება.

"მე ეს ფაქტი არ შემიმჩნევია და არ შემიმჩნევია რატომ: სტუდიაში, როგორც უკვე ბევრჯერ განიმარტა, მუშაობდა ექვსი კამერა, რომელიც სეგმენტებს იღებდა. ერთადერთი კამერა, რომელიც საერთო ხედს იღებდა, იყო ეგრეთ წოდებული "კრანი," რომელიც მოგეხსენებათ, რომ სულ მოძრაობს. ეს ვიდეო მე ბევრჯერ გადავახვიე და მინდოდა ზუსტად იმ მომენტის პოვნა, როდის დაეცა ეს ბავშვი. ჩემს თავში შემეპარა ეჭვი, რამე ხომ არ გამომრჩა. ადამიანობაში არა, ჩემს პროფესიონალიზმში შემეპარა ეჭვი. ვიპოვე ეს ვიდეო. თქვენ შეგიძლიათ გადახვევის პრინციპითაც ნახოთ, იმიტომ რომ იქ გაჟღერდა ვერსიები, რომ თითქოს ჩვენ დავამონტაჟეთ ეს სიმღერა და ისე დავდეთ სოციალურ ქსელში. უმარტივესია, გადაახვიეთ და ნახეთ, რა გავიდა პირდაპირ ეთერში. პირდაპირი ეთერის დამონტაჟება კი შეუძლებელია", — თქვა მან.

სალომე გოგინაშვილმა ბოდიში მოუხადა 10 წლის ანკას და მის ოჯახს მომხდარი ინციდენტის გამო. მან ასევე აღნიშნა, რომ მზად არის ჩაერთოს ნებისმიერ მსჯელობაში, რათა მომავალში მსგავსი პრეცედენტების დროს რეაგირება კიდევ უფრო უკეთესი იყოს:

"ვუერთდები ყველა ბოდიშს, ყველა ბოდიშს პირველ რიგში ანკას წინაშე და არა მარტო იმ წუთას, რაც მოხდა, მთელი ეს ერთი კვირა რაც ხდება, დარწმუნებული ვარ, რომ იმ ბავშვს ჩვენ ძალიან დიდ ზიანს ვაყენებთ ამითი. მე თვითონ დედა ვარ და ამიტომ შემიძლია ამის თქმა. იმ მომენტში, როდესაც ეს ბავშვი ეცემა, "კრანი", რომელიც უკვე გითხარით, რომ საერთო ხედზე მუშაობდა, იღებდა პირველ რიგში მდგომი ბავშვების პანორამას.

100%-ით შემიძლია გითხრათ, რომ საეთეროში მყოფი ვერც ერთი ადამიანი ვერ დაინახავდა ბავშვის დაცემას, იმიტომ რომ ამისი თეორიული შანსიც არ იყო.

კიდევ ერთხელ ვამბობ, პასუხისმგებელი ვარ 100%-ით ჩემს სიტყვებზე. პირველ რიგში იმიტომ, რომ ადამიანი ვარ და სხვის შვილს ამას ვერასდროს ვერ გავუკეთებ და მეორე რიგში იმიტომ, რომ მე ჩემი თავი გადავამოწმე პირველ რიგში, რამე ხომ არ შემეშალა, თუმცა მიუხედავად ამისა, მილიონი ბოდიში ანკასთან და მის ოჯახს იმის გამო, რომ ეს მოხდა. ბევრჯერ ვიფიქრე, აი რა რისი გამოსწორება შეიძლებოდა – ვერაფრის. თუმცა მზად ვარ, რომ ყველა მსჯელობაში ჩავერთო, რომ თუ ესეთი პრეცედენტი იქნება კიდევ, რა შეიძლება უკეთ გაკეთდეს, მაგრამ ამ წუთას ეს არის ერთადერთი სიმართლე", — განაცხადა სალომე გოგინაშვილმა.

შეგახსენებთ, 9 ივნისს სოციალურ ქსელში გავრცელდა ვიდეო, სადაც ჩანს სიმღერის დროს როგორ ეცემა ბავშვი, გუნდი კი სიმღერას განაგრძობს. ბავშვის ბებია, ანა კუხალეიშვილი სოციალურ ქსელში წერს, რომ "სამი წუთის განმავლობაში ბავშვი უყურადღებოდ იწვა იატაკზე. ამ სამი წუთის განმავლობაში არავინ იცოდა, ჰქონდა თუ არა თავის ტრავმა, სჭირდებოდა თუ არა სასწრაფო დახმარება". მისივე თქმით, "სიმღერის აკადემიას, რაც კი გაკვეთილი ჩაუტარებია გუშინდელ დღემდე, ყველაზე დიდი და მნიშვნელოვანი გაკვეთილი სწორედ გუშინ მიეცა. მაგრამ ეს გაკვეთილი ვერ ჩაატარეს. ყველაზე მთავარი გამორჩათ — ადამიანი, ბავშვი".