ოკუპირებული აფხაზეთის დე-ფაქტო ლიდერის, ბადრა გუნბას განცხადებით, აფხაზეთი სოხუმის საერთაშორისო აეროპორტიდან უცხოეთის ქალაქების მიმართულებით ფრენების დაწყებაზე მუშაობს და შესაბამისი პირობების შექმნის შემთხვევაში ახალი საერთაშორისო რეისების ამოქმედებასაც არ გამორიცხავს. ამის შესახებ ინფორმაციას რუსული მედია ავრცელებს.

გუნბამ აღნიშნავს, რომ ამ ეტაპზე სოხუმის აეროპორტიდან ფრენები მხოლოდ რუსეთის ქალაქების მიმართულებითაა, რაც, მისი თქმით, პრიორიტეტულია. თუმცა, დე-ფაქტო ხელისუფლება მომავალში სხვა ქვეყნების მიმართულებით რეისების დაწყებასაც განიხილავს.

"ცალსახად, რა თქმა უნდა, ამ მიმართულებით მუშაობას ვგეგმავთ," — განაცხადა გუნბამ კითხვაზე, გეგმავს თუ არა სოხუმის აეროპორტი უცხოეთის სახელმწიფოებთან საჰაერო მიმოსვლის დაწყებას.

მისივე თქმით, ამის შესაძლებლობას ამჟამად საქართველოსთან არსებული პოლიტიკური ვითარება და საერთაშორისო გარემო ზღუდავს.

"რუსეთის გარდა სხვა ქვეყნებთან ფრენების განხორციელება, სამწუხაროდ, ამ ეტაპზე შეუძლებელია, რადგან საქართველო ამას ICAO-ს (სამოქალაქო ავიაციის საერთაშორისო ორგანიზაციის) მეშვეობით ბლოკავს," — განაცხადა მან.

დე-ფაქტო ლიდერმა იმედი გამოთქვა, რომ აღნიშნული საკითხი მომავალში მოგვარდება და სოხუმის აეროპორტი საერთაშორისო მიმართულებების დამატებასაც შეძლებს.