ირანის პრეზიდენტმა მასუდ პეზეშქიანმა უზენაესი ლიდერის ოფისს გადადგომის ოფიციალური წერილი გაუგზავნა. ამის შესახებ ინფორმაციას Iran International წყაროზე დაყრდნობით ავრცელებს.

მათი ცნობით, პეზეშქიანმა წერილში აღნიშნა, რომ პრეზიდენტი და მთავრობა ფაქტობრივად ჩამოშორებულნი არიან ქვეყნისთვის მნიშვნელოვანი გადაწყვეტილებების მიღების პროცესს, რის შედეგადაც ძალაუფლება ირანის ისლამური რევოლუციის გვარდიის (IRGC) გავლენიან ჯგუფებს გადაეცა.

პეზეშქიანი თქმით, შექმნილ პირობებში ის ვეღარ ახერხებს მთავრობის მართვას და საკუთარი სამართლებრივი მოვალეობების შესრულებას, რის გამოც თანამდებობის დაუყოვნებლივ დატოვება მოითხოვა.

ამ ეტაპზე უცნობია, მიიღებს თუ არა უზენაესი ლიდერი მოჯთაბა ხამენეი პრეზიდენტის გადადგომას, თუმცა წერილის შინაარსი ირანის ხელისუფლების უმაღლეს ეშელონებში არსებულ ღრმა დაპირისპირებაზე მიუთითებს.

აღსანიშნავია, რომ ცნობა გავრცელდა ირანის მთავრობისა და სამხედრო-უსაფრთხოების სტრუქტურებს შორის თვეების განმავლობაში არსებული დაძაბულობის ფონზე. Iran International-მა ადრეც გაავრცელა ინფორმაცია, რომ IRGC-მ ეტაპობრივად შეზღუდა პრეზიდენტის უფლებამოსილებების ნაწილი და სახელმწიფო მმართველობის საკვანძო მიმართულებებზე გავლენა გააძლიერა.

ირანული მედია წერს, რომ არსებული ვითარების გამო პეზეშკიანის ადმინისტრაცია პოლიტიკურ და ადმინისტრაციულ ჩიხში აღმოჩნდა, რაც ხელს უშლის დიპლომატიური მოლაპარაკებების გაგრძელებას და მთავრობის სტრუქტურაში დაგეგმილი ცვლილებების განხორციელებას.

ცნობისთვის, ირანის ხელისუფლების წარმომადგენლები გავრცელებულ ინფორმაციას უარყოფენ და აცხადებენ, რომ პეზეშქიანი ჩვეულ რეჟიმში აგრძელებს საქმიანობას. პრეზიდენტის ადმინისტრაციამ და სახელმწიფო მედიამ გადადგომის შესახებ ცნობებს უსაფუძვლო უწოდა.