მეთიუ პერის პირად ასისტენტს, კენეთ ივამასას, რომელმაც სამედიცინო გამოცდილების არქონის მიუხედავად მსახიობს კეტამინი არაერთხელ მიაღებინა, 3 წლითა და 4 თვით პატიმრობა მიესაჯა. 61 წლის კენეთ ივამასას ბრალი ედებოდა კეტამინის უკანონო გავრცელებაში, რამაც ადამიანის სიკვდილი გამოიწვია. ივამასამ დანაშაული აღიარა, მისთვის შეფარდებული სასჯელი კი პროკურორების მოთხოვნას სრულად დაემთხვა.

კენეთ ივამასა სწორედ ის ადამიანია, რომელმაც 2023 წლის ოქტომბერში, ლოს-ანჯელესის სახლში, მეთიუ პერი ჯაკუზიში გარდაცვლილი იპოვა. ფედერალური პროკურორების განცხადებით, სახლიდან გასვლამდე ივამასამ მსახიობს მისივე თხოვნით კეტამინი მიაღებინა, უკან დაბრუნებულს კი პერი გარდაცვლილი დახვდა.

"ყველას წინაშე დიდ ბოდიშს ვიხდი. ვწუხვარ იმ უკანონო ქმედებების გამო, რომლებსაც მთელი ცხოვრება ვინანებ. ეს სინანული საფლავამდე გამყვება", — ასე მიმართა სასამართლო პროცესზე ივამასამ მსახიობის ოჯახს. პროცესზე ოჯახის წევრებიდან სიტყვით მხოლოდ პერის მამინაცვალი, კიტ მორისონი, გამოვიდა. მან აღნიშნა, რომ ივამასამ კეტამინზე პერის დამოკიდებულების შესახებ არავის შეატყობინა და მსახიობის სახლში კვლავ "მეფესავით ცხოვრება" ამჯობინა.

ამ საქმეში ივამასა რიგით მეხუთე და ბოლო ბრალდებულია, რომელსაც პერისთვის კეტამინის უკანონოდ მიწოდების სქემაში მონაწილეობისთვის განაჩენი გამოუტანეს. გამოძიების ინფორმაციით, გარდაცვალებამდე ბოლო სამი დღის განმავლობაში ივამასას დახმარებით მსახიობი კეტამინის 6-8 დოზას იღებდა. იმავე თვეში ივამასამ პერი უგონო მდგომარეობაში სულ მცირე ორჯერ იპოვა.

შეგახსენებთ, რომ პერის, რომელიც დიდი ხნის განმავლობაში ებრძოდა ნარკოდამოკიდებულებასა და დეპრესიას, ექიმმა სწორედ კეტამინი გამოუწერა მდგომარეობის გამოსასწორებლად. თუმცა, მსახიობს მალევე მოუნდა ნარკოტიკის იმაზე მეტი დოზის მიღება, ვიდრე ექიმმა ურჩია, რაც მისი გარდაცვალების მიზეზიც გახდა.