ეპიკური ბიბლიური დრამა 20 წელზე მეტი ხნის შემდეგ გრძელდება — მელ გიბსონის ქრისტეს ვნებანი მომავალ წელს დიდ ეკრანებზე მეორე ნაწილით დაბრუნდება. ფილმის გადაღებები, რომელიც იტალიაში 134 დღის განმავლობაში მიმდინარეობდა, დასრულებულია. და სანამ პროექტი, სახელწოდებით ქრისტეს აღდგომა, პოსტფროდაქშენის ეტაპზეა, უკვე შეგვიძლია პირველ კადრს შევავლოთ თვალი.

კადრში ქრისტეს როლის ახალ შემსრულებელს, ფინელ მსახიობ იააკო ოტონენის ვხედავთ, რომელიც მთაზე იესოს მიმდევრებითაა გარშემორტყმული. მთავარ როლთან ერთად, ქრისტეს ვნებანის გაგრძელებაში სხვა პერსონაჟებსაც ახალი მსახიობები ასახიერებენ. მარიამ ღვთისმშობელს, რომლის როლიც პირველ ფილმში რუმინელმა მაია მორგენშტერნმა შეასრულა, ამჯერად პოლონელი მსახიობი კასია სმუტნიაკი ასრულებს, მარიამ მაგდალელს (ქრისტეს ვნებანში მონიკა ბელუჩი) კი — კუბელი მარიელა გარიგა.

"ეს ფილმი მთელი ჩემი ცხოვრების შემოქმედების მთავარ ნაწილს წარმოადგენს", — აღნიშნავს გიბსონი გავრცელებულ განცხადებაში, — "მისთვის ყველაფრის გაღება მომიწია, როგორც რეჟისორსა და ხელოვანს. ამდენად, ჩემთვის იგი ფილმზე ბევრად მეტიც არის. ესაა მისია, რომლის შესასრულებლადაც 20 წელზე მეტი ხნის განმავლობაში ვემზადებოდი: მისია, რომ მოვყვე, ჩემი აზრით, ყველაზე მნიშვნელოვან ამბავს კაცობრიობის ისტორიაში".

პირველი კადრი მელ გიბსონის ახალი ფილმიდან ქრისტეს აღდგომა

ფოტო: Elise Lockwood / Lionsgate

ქრისტეს აღდგომა ორ ნაწილად გამოვა. თავდაპირველად იგეგმებოდა, რომ ორივე ნაწილი მომავალი წლის გაზაფხულზე უნდა გვეხილა, მაგრამ, როგორც ახლა ხდება ცნობილი, ფილმის პირველ ნაწილი კინოეკრანებზე 2027 წლის კათოლიკურ ამაღლებაზე, 6 მაისს, გამოვა, მეორე ნაწილის პრემიერა კი უკვე 2028 წლის ამაღლების დღესასწაულზე, 25 მაისს, შედგება.

რაც შეეხება ფილმების შინაარსს: ქრისტეს აღდგომაში თხრობა კვლავ ბიბლიურ სიუჟეტს მიჰყვება, ამბავი კი, გიბსონის თქმით, "ანგელოზების დაცემიდან ქრისტეს უკანასკნელი მოციქულის სიკვდილამდე" იქნება მოთხრობილი. რეჟისორი აღნიშნავდა, რომ თავისი ჩანაფიქრი "საკმაოდ ამბიციურია" და ბოლომდე დარწმუნებულიც კი არ იყო, რომ მისი შესრულება გამოუვიდოდა.

ბიბლიურ ისტორიაზე დაფუძნებული ქრისტეს ვნებანი, რომელიც ეკრანებზე 2004 წელს გამოვიდა, გახდა ყველა დროის ყველაზე მაღალშემოსავლიანი დამოუკიდებელი კინოპროექტი; $30-მილიონიანი ბიუჯეტის საპირწონედ, ფილმის შემოსავალმა $612 მილიონს გადააჭარბა.