Harry Potter-ის ჯადოსნური სამყაროს ხელახლა აღმოსაჩენად, HBO Max სპეციალურ პოდკასტს უშვებს.

პოდკასტი 19 მაისს გამოვა. ის პირველი ფილმის შესახებ გადაღებული ორი სპეციალური ეპიზოდით დაიწყება, ამის შემდეგ კი ახალი ეპიზოდები ყოველკვირეულად გამოქვეყნდება. თითოეულ ფილმს ორ-ორი ეპიზოდი დაეთმობა, ყოველი ეპიზოდი კი დაახლოებით 60 წუთი გაგრძელდება.

პოდკასტს ბრიტანელი კინოკრიტიკოსი და ჟურნალისტი, რიანა დილონი გაუძღვება. HBO Max-ის ინფორმაციით, მას მოწვეული თანაწამყვანებიც შეუერთდებიან. პოდკასტი ფილმების დეტალურ მიმოხილვასა და საინტერესო მომენტების განხილვას დაეთმობა. გარდა ამისა, რუბრიკაში Magic Makers დილონს სტუმრები ფილმის გადამღები ჯგუფიდან ეყოლება, რომლებიც იმ საიდუმლოებებს გაამჟღავნებენ, რაც ჯადოსნური სამყაროს ეკრანზე გასაცოცხლებლად იყო საჭირო.

HBO Max-ის განცხადებით, პოდკასტი პირველი ფილმის 25-ე იუბილეს ეძღვნება, რომელშიც მთავარ როლებს დენიელ რედკლიფი, რუპერტ გრინტი და ემა უოტსონი ასრულებდნენ. გარდა ამისა, პოდკასტის მიზანია, ჯ.კ. როულინგის წიგნების მიხედვით შექმნილი ახალი HBO-ს სერიალის გამოსვლამდე Harry Potter-ის ფილმები მაყურებელს კვლავ გაახსენოს. სერიალში სრულიად ახალი მსახიობები ითამაშებენ, პირველი სეზონის პრემიერა კი 2026 წლის შობასაა დაგეგმილი.

პოდკასტის ვიდეოვერსია მხოლოდ HBO Max-ზე იქნება ხელმისაწვდომი, ხოლო აუდიოვერსიას ყველა ძირითად პლატფორმაზე, მათ შორის Apple Podcasts-სა და Spotify-ზე მოისმენთ.