ფლორენს პიუ, პედრო პასკალი და ჰოლივუდის სხვა წარმომადგენლები Paramount-ისა და Warner Bros.-ის შერწყმის წინააღმდეგ გაერთიანდნენ. ღია წერილს, რომელიც ამ გარიგების ბლოკირებას მოითხოვს, უკვე ინდუსტრიის 2 000-ზე მეტი წარმომადგენელი აწერს ხელს. ახალ ხელმომწერთა შორის არიან ედვარდ ნორტონი და აცუკო ოკაცუკა, ხოლო თავდაპირველ სიაში, რომელიც ორშაბათს, 13 აპრილს გამოქვეყნდა, ფიგურირებდნენ ხოაკინ ფენიქსი, ბენ სტილერი და კრისტენ სტიუარტი.

წერილში, რომელიც New York Times-მა გამოაქვეყნა, ნათქვამია, რომ ხელმომწერები შეშფოთებულნი არიან ამ შერწყმის მხარდაჭერით, რადგან ის პრიორიტეტს ანიჭებს დაინტერესებულ პირთა გავლენიან მცირე ჯგუფს და ზიანს აყენებს საზოგადოებრივ სიკეთეს. მათი განცხადებით, კონკურენცია აუცილებელია ჯანსაღი ეკონომიკისა და დემოკრატიისთვის, შერწყმა კი საფრთხეს უქმნის ინდუსტრიის მთლიანობასა და მრავალფეროვნებას.

"ჩვენ გავხდით იმის მომსწრე, როგორ მკვეთრად იკლო წარმოებული და გამოშვებული ფილმების რაოდენობამ, რასაც თან ახლავს იმ ისტორიების მრავალფეროვნების შეზღუდვა, რომლებიც ფინანსდება და ვრცელდება", — ნათქვამია წერილში — "სულ უფრო ხშირად, მცირე რაოდენობის ძლიერი სუბიექტები წყვეტენ, რა უნდა შეიქმნას და რა პირობებით, რაც შემოქმედებსა და დამოუკიდებელ ბიზნესებს საკუთარი საქმიანობის გასაგრძელებლად ნაკლებ გზას უტოვებს".

Paramount Skydance-მა Warner Bros. Discovery-ის 111 მილიარდ დოლარად ყიდვის განზრახვა თებერვლის ბოლოს დააანონსა, მანამდე იყო Netflix-თან ბრძოლა ისტორიული სტუდიის ფლობისთვის. საპასუხოდ Paramount-მა ვრცელი განცხადება გაავრცელა, სადაც აღნიშნა, რომ პატივს სცემს კრეატიული საზოგადოების წუხილს, თუმცა ხაზი გაუსვა პირობას, რომ წარმოებას წელიწადში მინიმუმ 30 მხატვრულ ფილმამდე გაზრდიან, საკულტო ბრენდებს დამოუკიდებელი ხელმძღვანელობით შეინარჩუნებენ და შემოქმედებისთვის უფრო მეტ გზას უზრუნველყოფენ.

ამავე თემაზე: სტრიმინგ გიგანტების გაერთიანება — HBO Max და Paramount+ ერთი პლატფორმა გახდება

ხელმომწერთა ვრცელ სიაში ასევე შედიან ადამ მაკკეი, ბრაიან კრენსტონი, დევიდ ფინჩერი, დენი ვილნევი, ჯეი ჯეი აბრამსი, ჯეინ ფონდა და იორგოს ლანთიმოსი. ჯეინ ფონდამ მარტში გამართულ ოსკარის დაჯილდოებაზე სპეციალური სიმბოლოც გამოიყენა შერწყმის წინააღმდეგ პროტესტის ნიშნად. მან Variety-სთან ინტერვიუში აღნიშნა, რომ CNN-ის დამფუძნებელთან, ტედ ტერნერთან ქორწინების გამო, მისთვის ეს საკითხი პირადიცაა. ფონდას თქმით, Paramount-ის შერწყმა განსაკუთრებით პრობლემურია, რადგან ნებართვის მისაღებად კომპანიამ, შესაძლოა, დონალდ ტრამპის მოთხოვნების წინაშე უკან დაიხია, რაც მედიის დამოუკიდებლობას საფრთხეს უქმნის.