სტივენ კოლბერმა, ბეჭდების მბრძანებლის თავგადაკლულმა ფანმა, რომელსაც წიგნებიდან მთელი პასაჟების ციტირება შეუძლია, თავისი საზაფხულო საქმე იპოვა.

კოლბერი ფრენჩაიზის მომავალი ორი ფილმიდან მეორის სცენარის შესამუშავებლად მიიწვიეს. ის თავის ვაჟთან, პიტერ მაკგისთან და ბეჭდების მბრძანებლის ვეტერან სცენარისტთან, ფილიპა ბოიენსთან ერთად იმუშავებს პროექტზე ბეჭდების მბრძანებელი: წარსულის ჩრდილი (ამჟამად სამუშაო სათაურია). ეს ნაწილი მოჰყვება ფილმს ბეჭდების მბრძანებელი: ნადირობა გოლუმზე, რომლის რეჟისორიც გოლუმის როლის შემსრულებელი, ენდი სერკისია.

Warner Bros.-მა სიახლე სამშაბათს ღამით ვიდეო-განცხადებით გაავრცელა, რომელიც რეჟისორმა პიტერ ჯექსონმა გახსნა. ჯექსონმა, რომელმაც ჯ.რ.რ. ტოლკინის ბეჭდების მბრძანებლის (2001–2003) და ჰობიტის (2012–2014) ტრილოგიების ადაპტაცია გადაიღო, მიანიშნა "ძალიან განსაკუთრებულ პარტნიორზე", რომელთანაც ნადირობა გოლუმზე-ს შემდეგ იმუშავებდა, ხოლო მერე გვიანი ღამის შოუს წამყვანი წარადგინა.

ვიდეოზარის დროს კოლბერმა განმარტა, რომ წარსულის ჩრდილი მოიცავს ბეჭდის საძმოს იმ თავებს, რომლებიც ჯექსონის 2001 წლის ეკრანიზაციაში არ მოხვედრილა. "აღმოვაჩინე, რომ ისევ და ისევ ვკითხულობდი ბეჭდის საძმოს იმ ადრეულ ექვს თავს, რომლებიც შენ თავის დროზე პირველ ფილმში არ შეიტანე", — თქვა კოლბერმა — "ეს ძირითადად არის სამნი ერთად (Three is Company) ნისლი ყორღანებზეს (Fog on the Barrow-Downs) ჩათვლით. შემდეგ გავიფიქრე: "მოიცა, იქნებ ეს ცალკე ისტორია იყოს, რომელიც დიდ სიუჟეტში ჩაეწერება? შეგვიძლია შევქმნათ ისეთი რამ, რაც სრულად ერთგული იქნება წიგნებისაც და იმ ფილმებისაც, რომლებიც უკვე გადაიღე?"

კოლბერის თქმით, მას შემდეგ, რაც ეს იდეა შვილთან, პიტერთან (რომელიც ასევე სცენარისტია) ერთად განიხილა, მათ შეიმუშავეს ამ ამბის ჩარჩო სტრუქტურა. მიუხედავად იმისა, რომ ღამის შოუს წამყვანს რამდენიმე წელი დასჭირდა "სიმამაცის მოსაკრებად", რათა ჯექსონისთვის დაერეკა, მისი თქმით, ორი წლის წინ რეჟისორს იდეა იმდენად მოეწონა, რომ ადაპტაციაზე საუბარი დაიწყეს. მას შემდეგ ისინი ბოიენსთან ერთად მუშაობენ სცენარზე.

პიტერ ჯექსონი ბეჭდის საძმოს გადაღებებზე

ფოტო: Warner Bros.

წარსულის ჩრდილის სინოპსისის მიხედვით, ფილმის მოქმედება ფროდოს წასვლიდან 14 წლის შემდეგ ვითარდება და მოგვითხრობს სემის, მერის და პიპინის შესახებ, რომლებიც თავიანთი თავგადასავლის პირველი ნაბიჯების ხელახლა გადადგმას გადაწყვეტენ. ტიზერი მიანიშნებს, რომ "სემის ქალიშვილმა, ელანორმა, დიდი ხნის წინ დამარხული საიდუმლო აღმოაჩინა და განზრახული აქვს გაარკვიოს, რატომ იყო ბეჭდის ომი თითქმის წაგებული მის დაწყებამდე".

კოლბერმა აღნიშნა, რომ თავიდან ნერვიულობდა, შეძლებდა თუ არა ფილმის მოთხოვნებისა და წამყვანის მოვალეობების შეთავსებას, "აღმოჩნდა, რომ ამ ზაფხულიდან თავისუფალი ვიქნები". გასულ ივლისს CBS-მა გამოაცხადა, რომ The Late Show, რომელსაც კოლბერი ბოლო ათწლეულის განმავლობაში უძღვებოდა, 2026 წლის მაისში დასრულდება.

"ასე რომ, თუ მომიტევებთ, ახლა დაგტოვებთ, გადაცემა უნდა დავასრულო და ფილმის სცენარი დავწერო, მაგრამ ყველას გნახავთ მაზრაში (The Shire)", — მიმართა კოლბერმა ფანებს ზარის დასრულებამდე.

ასევე ნახეთ: ნადირობა გოლუმზე — ყველაფერი, რაც ბეჭდების მბრძანებლის ახალ ფილმზე ვიცით