როგორი იქნებოდა კოსმოსში მარტო გაღვიძება? თუ Project Hail Mary-ის (პროექტი ავე მარია) რაილანდ გრეისს (რომლის როლსაც რაიან გოსლინგი ასრულებს ახალ ადაპტაციაში) ჰკითხავთ, ვფიქრობ, ორ რამეს გიპასუხებთ: რთული და ძალიან უცნაური.

ამ გალაქტიკათშორისი თავგადასავლის დასაწყისში მთავარი გმირი ახალ და საშიშ რეალობას უპირისპირდება, როდესაც ირკვევა, რომ ის კოსმოსურ ხომალდზეა გამომწყვდეული და წარმოდგენა არ აქვს სად არის ან რატომ არის იქ. თავიდან ყველაფერი ძალიან ბუნდოვანია, სანამ პერსონაჟი არ გააცნობიერებს, რომ დედამიწის ბედი მასზეა დამოკიდებული.

პერსონაჟი იაზრებს, რომ ჩვენი პლანეტა ერთადერთი არ არის, რომელიც განადგურების პირასაა. გრეისი ერთიანდება ერიდიან როკისთან — უცხოპლანეტელთან, რომელიც გარეგნულად თითქოს ობობას ჰგავს, მაგრამ ასე დახასიათება ბოლომდე ზუსტი არ არის. ეს არსება სილიკონზე დაფუძნებული სიცოცხლის ფორმაა. ისინი ერთად ცდილობენ გაარკვიონ, როგორ დაამარცხონ პატარა, მაგრამ ძალიან საშიში მტერი — ასტროფაგი.

ფილმში მთავარ პერსონაჟს გადარჩენა ძალიან რთულ პირობებში უწევს, სადაც ვარსკვლავის სინათლე თითქმის ვეღარ აღწევს. ფილმი ენდი უირის ბესტსელერის ეკრანიზაციაა. Iflscience სწორედ წიგნის ავტორს დაუკავშირდა და ფილმის პრემიერის ფონზე მას რამდენიმე შეკითხვა დაუსვა.

თავად უირის ისტორიაც საინტერესოა, რადგან ის 20 წლის განმავლობაში პროგრამული უზრუნველყოფის ინჟინრად მუშაობდა, სანამ სამეცნიერო ფანტასტიკის ჟანრში "მარსელით" შემოაბიჯებდა. ეს მისი პირველი რომანი იყო, რომელმაც მკითხველის ყურადღება მალე მიიქცია და საბოლოოდ, ეკრანიზაციაც ვიხილეთ. თუ მარსელში სიუჟეტი მარსზე ვითარდება ახალ რომანში სრულიად ახალი ტიპის პლანეტასთან გვაქვს საქმე. მეტიც, Project Hail Mary-ში ახალი ტიპის სიცოცხლის ფორმაც ჩნდება.

ეს ახალი სიცოცხლის ფორმა უზომოდ ძლიერი, ჭკვიანი და "ქვისმაგვარი" არსებაა. მისი მშობლიური პლანეტა ჩვენს ჯოჯოხეთს ჰგავს და იქ სილიკონზე დაფუძნებული ცოცხალი ორგანიზმები არიან.

"ინსპირაციისთვის რეალური ეგზოპლანეტა ავარჩიე. უფრო სწორად, იმ დროს, როდესაც წიგნზე მუშაობა დავიწყე, ითვლებოდა, რომ ეს იყო პლანეტა და ახლოს იყო ვარსკვლავ 40 ერიდიანთან — იმდენად ახლოს, რომ ის ვარსკვლავის გარშემო ყოველ 46 დღეში ერთხელ ბრუნავს. ასე რომ, ეს პლანეტა გაცილებით უფრო ახლოს უნდა ყოფილიყო თავის ვარსკვლავთან, ვიდრე მერკური მზესთან", — უთხრა უირიმ Iflscience-ს.

უირის თქმით, მას ასეთ ექსტრემალურ პირობებში უნდოდა ბიოსფეროს წარმოდგენა. ასეთ გარემოს თხევადი წყალი დასჭირდებოდა, მაგრამ როგორ შეიძლებოდა პლანეტა ასე ახლოს ყოფილიყო ვარსკვლავთან და წყალი არ აორთქლებულიყო? მან გამოსავალი ჰაერის მაღალ წნევაში გამონახა.

როგორ? თუ ჰაერის წნევას გაზრდით, წყლის დუღილის ტემპერატურაც გაიზრდება. შესაბამისად, მაღალი ტემპერატურის მიუხედავად, წყალი შეიძლება თხევად ფორმაში დარჩეს.

უირიმ შექმნა ერიდიანების პლანეტა, რომელზეც ძალიან ცხელი გარემოა, მაგრამ დიდი წნევის გამო თხევადი წყალი მაინც არსებობს, რაც ქმნის სიცოცხლის განვითარებისთვის უცნაურს, მაგრამ პირობებს.

"ამიტომ, თუ პლანეტის ზედაპირზე ჩახვალთ, იქ არიან ერიდიანები — პლანეტის ტოპ მტაცებლები, ისე, როგორც ჩვენ ვართ დედამიწის უმაღლესი მტაცებლები. მე შევქმენი მათი მორფოლოგია და ბიოლოგია სწორედ ამ პირობების გათვალისწინებით", — აღნიშნა უირიმ.

Project Hail Mary-ის პრემიერა საქართველოში 20 მარტს შედგება. უირის წიგნს თუ გავითვალისწინებთ, სამეცნიერო ფანტასტიკის მოყვარულებს ეკრანიზაციაც უნდა მოეწონოთ.