ინფორმირებულ წყაროზე დაყრდნობით, გამოცემა ბლუმბერგი ავრცელებს, რომ Netflix 600 მილიონ დოლარამდე გადაიხდის InterPositive-ში, ხელოვნური ინტელექტის (AI) კინომწარმოებელ კომპანიაში, რომელიც ბენ აფლეკმა დააფუძნა. ეს შენაძენი სტრიმინგის ლიდერისთვის ერთ-ერთი უმსხვილესი გარიგება იქნება.

რეალური ფასი, რომელიც ნაღდი ფულით იქნა გადახდილი, შედარებით ნაკლები იყო, აცხადებენ წყაროები, რომლებმაც ვინაობის გამჟღავნება არ ისურვეს, ვინაიდან პირობები კონფიდენციალურია. InterPositive-ის მფლობელები კიდევ უფრო მეტს მიიღებენ, თუ კომპანია გარკვეულ ეფექტურობის სამიზნე მაჩვენებლებს მიაღწევს. Netflix-ს, რომელმაც ცოტა ხნის წინ უშედეგოდ სცადა Warner Bros. Discovery Inc.-ის შეძენა, გარიგების დეტალები ოფიციალურად არ გაუსაჯაროებია.

სტრიმინგ პლატფორმა InterPositive-ს ყიდულობს ფილმების წარმოების პროცესში ხელოვნური ინტელექტის გამოყენების დასაჩქარებლად. სტარტაპს შემუშავებული აქვს ინსტრუმენტების ნაკრები, რომელიც კინემატოგრაფისტებს გადაღებული კადრების შეცვლის საშუალებას აძლევს. ეს პროდუქტები მომავალ ფილმზე უკვე გამოიყენა დევიდ ფინჩერმა, რომელშიც მთავარ როლს ბრედ პიტი ასრულებს.

ეს შენაძენი ასევე ერთ-ერთი უმსხვილესი AI გარიგებაა ჰოლივუდის წამყვან სტუდიებს შორის. ისეთი კომპანიები, როგორიცაა Netflix და Amazon, სულ უფრო ხშირად ატარებენ ექსპერიმენტებს AI ტექნოლოგიით წარმოების ხარჯების შესამცირებლად და ნამუშევრების ხარისხის გასაუმჯობესებლად. Amazon-მა შექმნა შიდა გუნდი AI-ს დასანერგად კინო და სატელევიზიო წარმოებაში, ხოლო Walt Disney Co.-მ კომერციული პარტნიორობა გააფორმა OpenAI-სთან.

ჰოლივუდში შიშობენ, რომ სტუდიები ხელოვნურ ინტელექტს სამუშაო ადგილების გასაუქმებლად და ხარჯების დასაზოგად გამოიყენებენ. ასევე არის წუხილი, რომ AI-ს გასაწვრთნელად ტექნოლოგიური კომპანიები მოიპარავენ ნამუშევრებს ყოველგვარი კომპენსაციის გარეშე.

აფლეკმა InterPositive შექმნა, როგორც ინსტრუმენტი კინემატოგრაფისტებისთვის: რეჟისორმა ჯერ უნდა გადაიღოს ფილმი, რათა პროგრამულმა უზრუნველყოფამ ამ მასალის გამოყენებით "ისწავლოს". მხოლოდ ამის შემდეგ შეუძლია მას ზედმეტი ნივთების ამოშლა ან სცენის ფონის შეცვლა. ის არ იწვრთნება ფილმებზე ნებართვის გარეშე და არ აგენერირებს ახალ პროექტებს საბაზისო ფილმის გარეშე.

Warner Bros.-ის 72 მილიარდად ყიდვის მცდელობამდე, Netflix ძირითადად თავს არიდებდა ძვირადღირებულ გარიგებებს და აცხადებდა, რომ ურჩევნია თავად შექმნას, ვიდრე იყიდოს. სტარტაპის შეძენა, მიუხედავად იმისა, რომ ეს ჰოლივუდში ერთ-ერთი უდიდესი AI გარიგებაა, შეიძლება ჩაითვალოს პირველ კატეგორიაში: ნაბიჯი Netflix-ის მხრიდან საკუთარი AI შესაძლებლობების ასაშენებლად.

აფლეკმა InterPositive საიდუმლოდ დააფუძნა. ტექნოლოგიაზე მუშაობის რამდენიმე წლის შემდეგ, მან ინვესტიციების მოზიდვა 2025 წელს დაიწყო, შეხვდა რამდენიმე ვენჩურულ ფირმას და ასევე ჰოლივუდის კომპანიებს ტექნოლოგიის გამოყენების თაობაზე. ამან მიიყვანა Netflix იქამდე, რომ დაენახა ეს ტექნოლოგია, როგორც შიდა წარმოების ინსტრუმენტი.

"კინოწარმოების პროცესი, მისი დაარსებიდანვე, ერთი დიდი ტექნოლოგიური პროგრესი იყო", — განაცხადა აფლეკმა Netflix-ის მიერ გამოქვეყნებულ ვიდეოში — "ჩვენ ყოველთვის ვცდილობდით, ის უფრო რეალისტური და გულწრფელი გაგვეხადა, და იმედი მაქვს, InterPositive არის კიდევ ერთი ნაბიჯი ამ ხანგრძლივი და მდიდარი ისტორიის შესაბამისად".