ოკუპირებულ აფხაზეთის ოჩამჩირის რაიონის სოფელში დრონის ნარჩენები აღმოაჩინეს. "ეხო კავკაზას" სცნობით, შეჯახებისას დრონმა ელექტროგადამცემი ხაზი დააზიანა. ოკუპირებული აფხაზეთის თავდაცვის სამინისტრომ აღნიშნული ინფორმაცია რუსულ მედიას დაუდასტურა.

ოკუპირებული აფხაზეთის საგანგებო სიტუაციების სამინისტრომ გაავრცელა ინფორმაცია გაგრაში, ახალ ათონსა და გულრიფშში ჩამოვარდნილი დრონის ფრაგმენტების შესახებ, თუმცა ადგილზე მისულმა მაშველებმა მათი ადგილმდებარეობის დადგენა ვერ შეძლეს; ინფორმაცია არ დადასტურდა.

ე.წ. თავდაცვის სამინისტრომ მოქალაქეებს მოუწოდა, "შეინარჩუნონ სიმშვიდე და თუ ისინი აღმოაჩენენ თვითმფრინავის ან მისი ფრაგმენტების ჩამოვარდნის ადგილებს, არ მიუახლოვდნენ მათ, არ შეეხონ და დაუყოვნებლივ აცნობონ" შესაბამის ორგანოებს.

ინფორმაციის დადასტურებამდე, სოციალურ მედიაში გამოქვეყნდა ოკუპირებულ აფხაზეთის თავზე დრონების ფრენის ვიდეოები. მანამდე, 4 მარტის საღამოს, "დრონების საფრთხის" გამო, ფსოუს საკონტროლო-გამშვები პუნქტიც შეჩერდა.