სებ-მა ფინანსურ ბაზრებზე მოქმედი ინსტიტუტების წარმომადგენლებისთვის ჩინეთის ობლიგაციების ბაზარზე წვდომის შესახებ შეხვედრა შედგა.

სებ-ის ცნობით, შეხვედრის ფარგლებში საერთაშორისო რეზერვების დივერსიფიკაციის პოლიტიკა და ჩინურ იუანში დენომინირებულ აქტივებში ინვესტირების პრაქტიკა განიხილეს. მხარეებმა საერთაშორისო სავალუტო სისტემაში ჩინური იუანის როლის ზრდაზე იმსჯელეს.

"აღინიშნა, რომ საერთაშორისო სავალუტო ფონდმა იუანი სპეციალური ნასესხობის უფლებების (SDR) კალათში აშშ დოლართან, ევროსთან, იაპონურ იენასა და ბრიტანულ ფუნტ სტერლინგთან ერთად მეხუთე ვალუტად შეიყვანა.

შეხვედრის მონაწილეები გაეცნენ კონკრეტული ქვეყნების მაგალითებს, რომელთაც ჩინურ იუანში უკვე მოახდინეს ინვესტირება. მათ შორის — იაპონიას 10 მილიარდი აშშ დოლარის ეკვივალენტის ინვესტიცია აქვს განხორციელებული ჩინურ აქტივებში; ავსტრალია — 1.9 მილიარდი აშშ დოლარი; შვეიცარიას კი 15 მილიარდი იუანის საინვესტიციო კვოტა აქვს, რაც დაახლოებით 2.4 მილიარდი აშშ დოლარის მოცულობის განთავსების შესაძლებლობას ნიშნავს.

ამასთან, ევროპის ცენტრალურმა ბანკმა ჯერ კიდევ 2017 წელს განახორციელა პირველი, 500 მილიონი ევროს მოცულობის ინვესტიცია ჩინურ ფასიან ქაღალდებში.

აღნიშნული პრაქტიკა ცხადყოფს, რომ ჩინურ იუანში და ჩინურ ფასიან ქაღალდებში ინვესტირება ცენტრალური ბანკებისთვის დივერსიფიკაციის სტანდარტულ და აპრობირებულ ინსტრუმენტს წარმოადგენს.

ჩინურ ფინანსურ ბაზრებზე ოპერირების შესაძლებლობა კიდევ უფრო გაფართოვდა მას შემდეგ, რაც საქართველოს ეროვნულმა ბანკმა მსოფლიოს ერთ-ერთ უმსხვილეს და უმნიშვნელოვანეს საფინანსო ბაზარზე — ჩინეთის ბანკთაშორის ობლიგაციების ბაზარზე (China Interbank Bond Market — CIBM) მოიპოვა წვდომა.

"CIBM-ზე წვდომის მოპოვება მნიშვნელოვანი ეტაპია საქართველოს ეროვნული ბანკის საინვესტიციო პოლიტიკის განვითარებაში. ის შესაძლებლობას გვაძლევს უფრო მოქნილად და ეფექტიანად ვმართოთ საერთაშორისო რეზერვები, გავაფართოვოთ საინვესტიციო ინსტრუმენტების სპექტრი და გავაძლიეროთ რისკების მართვის ჩარჩო", — განცხადა ნათია თურნავამ.

საქართველოს ეროვნული ბანკის პრეზიდენტმა ასევე განმარტა, რომ ჩინურ იუანში და ჩინურ სახელმწიფო ფასიან ქაღალდებში ინვესტირება დივერსიფიკაციის მიზნით ხორციელდება. მთლიანობაში არაძირითადი ვალუტების წილი 10%-ით არის განსაზღვრული, საიდანაც ჩინური იუანის ინსტრუმენტებში დაახლოებით 5%-მდე იქნება განთავსებული.

"საქართველოსთვის მნიშვნელოვანია, რომ საერთაშორისო რეზერვები იყოს დივერსიფიცირებული როგორც ვალუტების, ასევე აქტივების ტიპებისა და გეოგრაფიული არეალის მიხედვით. აღნიშნული მიდგომა კონცენტრაციის რისკებს ამცირებს და რეზერვების მდგრად მართვას უზრუნველყობს. საქართველოს ეროვნული ბანკი მომავალშიც განაგრძობს საერთაშორისო რეზერვების მართვას კონსერვატიული, დაბალრისკიანი და დივერსიფიცირებული საინვესტიციო პოლიტიკის შესაბამისად, საუკეთესო საერთაშორისო პრაქტიკის გათვალისწინებით",— დასძინა სებ-ის პრეზიდენტმა.