ახალ-ახალი ტრეილერებისა და თიზერების გამოჩენასთან ერთად, კრისტოფერ ნოლანის მძაფრსიუჟეტიანი ეპიკური ფილმის, ოდისეას, მიმართ ინტერესი დღითიდღე იზრდება.

ფილმი ჰომეროსის ოდისეას ერთ-ერთი ადაპტაციაა. ის მოგვითხრობს ითაკას მეფის, ოდისევსის, 10-წლიან მოგზაურობზე, როცა ტროას ომის შემდეგ ის სახლში ბრუნდება. გზად ის მრავალ საფრთხეს წააწყდება და აღმოაჩენს, რომ მისი თანამგზავრები დაიღუპნენ.

პოემის არაერთი ადაპტაცია უკვე ვიხილეთ, მათ შორის ჯუზეპე დე ლიგუოროს 1911 წელს გადაღებული უხმო ფილმი, კირკ დუგლასის მონაწილეობით გადაღებული 1954 წლის ფილმი Ulysses, ძმები კოენების საკულტო კომედია O Brother, Where Art Thou? და სხვები.

ჰომეროსის ოდისეა (1911)

ჰომეროსის ოდისეა (1911)

ფოტო: IMDB

Ulysses (1954)

Ulysses (1954)

ფოტო: IMDB

რაც შეეხება ფილმის ახალ ადაპტაციას, მას ოსკაროსანი რეჟისორი, კრისტოფერ ნოლანი, გადაიღებს. აღსანიშნავია, რომ ოდისეას ბიუჯეტი $250 მილიონ დოლარს შეადგენს, რაც მას ნოლანის კარიერაში ყველაზე ძვირადღირებულ ფილმად აქცევს.

როგორც ცნობილია, მთავარი როლის შემსრულებელი მსახიობების გარდა — მეთ დეიმონი, ტომ ჰოლანდი, ჯონ ბერნთალი, ზენდეია, რობერტ პატინსონი, ლუპიტა ნიონგო, მია გოთი — ელიოტ ფეიჯს, ჰიმეშ პატელსა და რეპერ ტრევის სკოტს, ვიხილავთ.

ფილმის ოფიციალური პოსტერი

ფილმის ოფიციალური პოსტერი

ფოტო: IMDB

აღსანიშნავია ისიც, რომ სანამ ფილმის ოფიციალურ ტრეილერს ვიხილავდით, მისი თიზერი ზაფხულში დაუგეგმავად გავრცელდა. ოდისეას თიზერი პირველად კინოთეატრებში გარეთ ედვარდსის გახმაურებული ფილმის — იურული სამყარო: გამოღვიძება — შემდეგ აჩვენეს, რომლის პრემიერა 2025 წლის 2 ივლისს შედგა.

გარდა ამისა, დადასტურდა ინფორმაცია, რომ ოდისეა არის პირველი ფილმი, რომელიც სრულიად IMAX-ის კამერებით არის გადაღებული.

ჯერჯერობით უცნობია, ზედმიწევნით მიჰყვება თუ არა ფილმის ახალი ადაპტაცია ჰომეროსის პოემას, თუმცა Universal Pictures-ის სოციალურ ქსელში გამოქვეყნებულ პოსტში ნათქვამია, რომ "მითურ და მძაფრსიუჟეტიან ეპიკურ ფილმს მთელს მსოფლიოში გადაიღებენ".

ფოტო: Universal

Variety-ის ინფორმაციით, ოდისეას გადაღებები გასული წლის გაზაფხულს ფავინიანას კუნძულზე, სიცილიაში, დაიწყო. ეს უკანასკნელი ცნობილია, როგორც "თხების კუნძული" და ბევრი მიიჩნევს, რომ ფავინიანა სწორედ ის ადგილია, სადაც ჰომეროსმა ოდისევსისა და მისი ეკიპაჟის მიწაზე დაშვება წარმოიდგინა.

შეგახსენებთ, რომ ოდისეას კინოთეატრებში 2026 წლის 17 ივლისს ვიხილავთ. მანამდე კი შეგიძლიათ ნახოთ ფილმის ტრეილერი.