საია-მ საგანგებო ბრიფინგზე განაცხადა, რომ იწყებს სამართალწარმოებას იმ მოქალაქეების სახელით, რომლებიც 2024 წლის ნოემბრის-დეკემბრის აქციებზე წყლის ჭავლში შერეული ნივთიერებების გამოყენების შედეგად დაზიანდნენ და შესაბამისი კომუნიკაციით მიმართავენ პროკურატურას. საია-ს განცახდებით, ამ დროისთვის 7 მოქალაქის უფლებებს იცავენ.

"ჩვენ ვიწყებთ წყლის ჭავლში შერეული ნივთიერების შედეგად დაზიანებული ადამიანების სახელით სამართალწარმოებას. სამართალწარმოების პირველი ნაბიჯი არის სწორედ საქართველოს გენერალურ პროკურატურაში ოფიციალური განცხადების წარდგენა. ამ განცხადებაში ჩვენ ვასაბუთებთ არა მარტო ინდივიდუალურ გარემოებებს კონკრეტულ პირებთან მიმართებით, რომლებიც დაზიანდნენ და რა სახის დაზიანებას უჩივიან, არამედ ვასაბუთებთ, ზოგადად, წყლის ჭავლში ქიმიური ნივთიერების შერევის პრაქტიკის უკანონობას საქართველოს კანონმდებლობით და ამ უკანონობის შესწავლის აუცილებლობას, მათ შორის სისხლის სამართლის კოდექსის ფარგლებში.

დემონსტრანტთა ნაწილი, რომლებმაც წყლის ჭავლის ზემოქმედება განიცადა, მიუთითებდნენ ჯანმრთელობის პრობლემებზე, კერძოდ კანის დამწვრობაზე, მხედველობის გაუარესებაზე, სუნთქვის უკმარისობაზე, ნევროლოგიურ პრობლემებზე, ალერგიულ რეაქციაზე, სმენის გართულებაზე, სახსრების ტკივილზე, ფარისებრ ჯირკვალთან დაკავშირებულ პრობლემებზე და სხვა.

საქართველოს ახალგაზრდა იურისტთა ასოციაცია ამ ეტაპზე სამართლებრივად იცავს 7 დაზარალებულს, რომლებმაც ორგანიზაციას სხვადასხვა სახის ჯანმრთელობის პრობლემაზე მიაწოდეს ინფორმაცია და თითოეულ მათგანს აღნიშნული პრობლემები დღემდე აწუხებთ. ისინი აღნიშნულს 2024 წლის ნოემბერ-დეკემბერში შსს-ის მხრიდან საპროტესტო აქციებზე მათ წინააღმდეგ გამოყენებულ სპეციალურ საშუალებებს უკავშირებენ," — განაცხადა საია-ს ხელმძღვანელმა, თამარ ონიანმა ბრიფინგზე.