"გამოვდივარ ინიციატივით, ვიფიქროთ სახელმწიფო ბანკის შექმნაზე, რომელიც კიდევ უფრო გააადვილებს რეგულაციებს იმ უმნიშვნელოვანესი სოციალური მიმართულებით, რომელიც საინტერესოა ჩვენი მოსახლეობისთვის" — ამის შესახებ პოლიტიკური ჯგუფის ევროპელი სოციალისტების ლიდერმა, ილია ინჯიამ ოცნების პარლამენტის საგაზაფხულო სესიის პლენარულ სხდომაზე განაცხადა.

"რა თქმა უნდა, უმნიშვნელოვანესია ფასების დარეგულირება. ეს პირდაპირ კავშირშია სოციალურ მდგომარეობასთან. ბევრი რამ იქნება ნათელი ამ პროცესის მიმდინარეობისას, დარწმუნებული ვარ, ფასის შედგენაში დიდი მონაწილეობა ექნება საბანკო სისტემას და საპროცენტო განაკვეთს. ეს ხვალინდელი დღეა, ამ დეტალებს უფრო ნათელს გახდის კომისიის მუშაობა.

გამოვდივარ ინიციატივით: უმნიშვნელოვანესია ჩვენი ქვეყნის სუვერენიტეტის კიდევ უფრო გამტკიცებისთვის ვიფიქროთ სახელმწიფო ბანკის შექმნაზე, რომელიც კიდევ უფრო გააადვილებს რეგულაციებს იმ უმნიშვნელოვანესი სოციალური მიმართულებით, რომელიც საინტერესოა ჩვენი მოსახლეობისთვის.

ხვალინდელი ჩვენი მუშაობა მოკლე ვადაში უნდა დავასრულოთ, რათა ჩქარა შევუდგეთ ფასების კლებას. ეს არ უნდა აისახოს პროდუქტის ხარისხზე",—განაცხადა ილია ინჯიამ.

შეგახსენებთ, 24 დეკემბერს, ქართულმა ოცნებამ სოციალურ ქსელში გაავრცელა ვიდეორგოლი, სადაც ოცნების პრემიერი ირაკლი კობახიძე სასურსათო პროდუქტების ფასების მატებაზე საუბრობს. მისი განცხადებით, "ქართულ და ევროპულ ფასებს შორის სხვაობა საკმაოდ დიდია" და ამის მიზეზი "სადისტრიბუციო კომპანიებისა და მარკეტების მაღალი ფასნამატია, რომელიც საქართველოს საზღვრიდან დახლამდე საშუალოდ 86%-ს შეადგენს". ამავე ვიდეოში მან სუს-ს მოუწოდა, შეისწავლონ სასურსათო პროდუქტების ფასებთან დაკავშირებული საკითხი და დაადგინონ, ხომ არ იკვეთება დანაშაულის ნიშნები. ამას გარდა, ირაკლი კობახიძე პარლამენტს მოსთოვა," შეექმნა საპარლამენტო კომისია, რომელიც საკითხის შესაფასებლად შესაბამის საპარლამენტო ბერკეტებს გამოიყენებს".