ესპანეთის პოლიციამ განაცხადა, რომ ქვეყნის სამხრეთში, კვირას მომხდარი ჩქაროსნული მატარებლების შეჯახების შედეგად სულ მცირე 39 ადამიანი დაიღუპა, ხოლო სამაშველო ოპერაცია კვლავ გრძელდება. ამის შესახებ ინფორმაციას უცხოური მედია ავრცელებს.

სარკინიგზო ოპერატორმა Adif-მა განაცხადა, რომ შეჯახება მაშინ მოცდა, როდესაც მალაგიდან მადრიდის მიმართულებით მოძრავი მატარებლის ბოლო ნაწილი, რომელშიც დაახლოებით 300 მგზავრი იმყოფებოდა, ლიანდაგიდან გადავიდა. ამის შემდეგ ის მადრიდიდან ჰუელვასკენ მიმავალ სხვა მატარებელს დაეჯახა.

ანდალუსიის რეგიონის პრეზიდენტმა ხუანმას მორენომ თქვა, რომ 75 მგზავრი საავადმყოფოში გადაიყვანეს, მათგან უმეტესობა — კორდობაში.

ესპანეთის წითელმა ჯვარმა ავარიის ადგილთან ახლოს, ქალაქ ადამუსში, დახმარების ცენტრი გახსნა, სადაც საგანგებო სამსახურებსა და იმ ადამიანებს ეხმარებოდნენ, რომლებიც ინფორმაციას ეძებდნენ. მთელი ღამის განმავლობაში ადგილზე მუშაობდნენ ესპანეთის სამოქალაქო გვარდიისა და სამოქალაქო თავდაცვის წარმომადგენლები.