14 დეკემბერს, თესალონიკის ამპელოკიპის რაიონში 44 წლის საქართველოს მოქალაქემ 34 წლის პარტნიორის მოკვლა სცადა — ინფორმაციას ბერძნული მედია ავრცელებს. კაცმა 34 წლის უკრაინელ ქალს კისერზე თასმები ორჯერ შემოახვია, თუმცა დაზარალებულმა შეძლო გაქცევა და საბრძოლო ხელოვნების უნარების წყალობით თავი დაიცვა.

გამოცემა წერს, რომ მოვლენას წინ უძღოდა ეჭვიანობის ნიადაგზე დაწყებული კონფლიქტი, რომელიც თავდაპირველად სატელეფონო საუბრისას დაიწყო. გამოძიების დოკუმენტების მიხედვით, ბრალდებულმა თავდაპირველად საკუთარი კომბინეზონის თასმა გამოიყენა, შემდეგ კი მეორე — რომელიც ქალის ბლუზიდან მოხსნა. მან ორივე მჭიდროდ შემოახვია ქალს კისერზე, სავარაუდოდ, სასუნთქი გზების გადაკეტვის მიზნით.

დაზარალებულმა დაკითხვისას განაცხადა, რომ საბრძოლო ხელოვნების ცოდნის წყალობით შეძლო ხელი ჩაედო თოკებსა და კისერს შორის, რითაც დახრჩობა თავიდან აიცილა.

პოლიციის გამოძიების შედეგად დადგინდა, რომ ინციდენტის დროს ბრალდებული ალკოჰოლის ზემოქმედების ქვეშ იმყოფებოდა.

საქართველოს მოქალაქის წინააღმდეგ მძიმე დანაშაულის კვალიფიკაციით სისხლის სამართლებრივი დევნა ოჯახის წევრის მკვლელობის მცდელობისთვის დაიწყო, რომელიც არასრულწლოვანის თანდასწრებით მოხდა.

დაზარალებულ ქალს გადაეცა "პანიკის ღილაკის" აპლიკაცია. მან ასევე განაცხადა, რომ არ სურდა შვილთან ერთად გადაეყვანათ ფსიქო-სოციალური მხარდაჭერისა და დახმარების დაწესებულებაში. შესაბამისად, დედა და შვილი საკუთარ საცხოვრებელ სახლში დაბრუნდნენ.