ბელგიის პოლიციამ ევროკავშირის ყოფილი უმაღლესი დიპლომატი ფედერიკა მოგერინი და ევროკავშირის საგარეო სამსახურების ყოფილი ხელმძღვანელი სტეფანო სანინო, რომლებიც თაღლითობის საქმეზე დაკითხვისთვის იყვნენ დაკავებულნი, გაათავისუფლა. ამის შესახებ ინფორმაციას Politico ევროკავშირის გენერალურ პროკურორზე დაყრდნობით ავრცელებს.

ევროპის კოლეჯის რექტორი ფედერიკა მოგერინი და ევროპის კოლეჯის ერთ-ერთი თანამშრომელი სტეფანო სანინო სამშაბათს, 2 დეკემბერს, დააკავეს. გამოძიება არკვევს იყო თუ არა 2021-22 წლებში ევროპის საგარეო ქმედებების სამსახურის (EEAS) მიერ გამოცხადებული საჯარო ტენდერი მანიპულირებული, რომლითაც უპირატესობა ევროპის კოლეჯს მიენიჭა.

"ბრალდებები სახელმწიფო შესყიდვებში თაღლითობასა და კორუფციას, ინტერესთა კონფლიქტს და პროფესიული საიდუმლოების დარღვევას ეხება. დაკავებულები გაათავისუფლეს, რადგან მათი მიმალვის რისკი არ არსებობს," — აღნიშნულია პროკურატურის განცხადებაში.

ბრალდებები დადასტურებული არ არის. მოგერინი, სანინო და დაკავებული მესამე პირი უდანაშაულოდ ითვლებიან, სანამ სასამართლო მათ დანაშაულს არ დაადგენს.

ცნობისთვის, ბელგის პოლიციამ, ევროკავშირის სახსრების შესაძლო თაღლითურად გამოყენების საქმესთან დაკავშირებით, ბრიუსელში ევროკავშირის საგარეო ქმედებათა სამსახურში (EEAS), ასევე ბრუგეში ევროპის კოლეჯსა და რამდენიმე კერძო სახლში ჩხრეკა გუშინ, 2 დეკემბერს, ჩაატარა.

სამართალდამცველებმა ამოიღეს დოკუმენტები და დაკითხვისთვის სამი ადამიანი დააკავეს, მათ შორის იყო ევროკავშირის ყოფილი უმაღლესი წარმომადგენელი საგარეო პოლიტიკისა და უსაფრთხოების საკითხებში და ამჟამინდელი ევროპის კოლეჯის რექტორი ფედერიკა მოგერინი.

ბელგიის პოლიციამ EEAS-სა და ევროპის კოლეჯში ჩხრეკა ჩაატარა — დაკავებულებს შორისაა ფედერიკა მოგერინი