თბილისის მერის, კახა კალაძე აცხადებს, რომ Eagle Hills-ის პროექტს პოზიტივის და პლუსების მეტი არაფერი აქვს. ჟურნალისტის კითხვაზე — ხედავ თუ არა კორუფციის ნიშნებს იმაში, რომ პროექტის განხორციელებაში "ქართული ოცნების" წევრის ლევან მაჭავარიანის ძმის კომპანიაა ჩართული, მერი პასუხობს, ეს კერძო კომპანიის გადასაწყვეტია და არავითარ კორუფციას აქ ადგილი არ აქვს.

"კერძო კომპანია ვის გააკეთებინებს პროექტს, ან პროექტირებას, ეს ვისი რა საქმეა. მთელი ამ ხნის განმავლობაში ცდილობთ, როგორმე დააზიანოთ აღნიშნული ინვესტიცია, რომელიც ჩვენი ქვეყნის ეკონომიკური განვითარებისთვის ძალიან მნიშვნელოვანია, თუნდაც ახალი სამუშაო ადგილების შექმნის თვალსაზრისით, ან თუნდაც ბიუჯეტში შემოსული თანხების თვალსაზრისით, ქართული კომპანიების ჩართულობით. ამ პროექტს პოზიტივის და პლუსების მეტი არაფერი აქვს", — განაცხადა კახა კალაძემ.

მისივე თქმით, პროექტის განხორციელებით რეკრეაციულ არეალებს საფრთხე არ ემუქრება.

"რეკრეაციული სივრცეები და ტყით დაფარული არეალები, რომელიც არის კრწანისის ტყე-პარკში, რა თქმა უნდა, შენარჩუნდება. არის ტბები, რომელიც შენარჩუნებული იქნება, ოღონდ მოწესრიგდება, განახლდება და იქ მისულ ადამიანებს ექნებათ შესაძლებლობა, ძალიან სასიამოვნო გარემოში დაისვენონ, გაერთონ, იცხოვრონ", — განაცხადა კახა კალაძემ.