სავარაუდო მაფიური ტიპის სროლის შედეგად, რომელიც ოკუპირებულ აფხაზეთში 11 ნოემბერს მოხდა, ხუთი ადამიანი დაშავდა. არსებული ინფორმაციით დაშავებულთა შორის არის ცნობილ კრიმინალურ ავტორიტეტად აღიარებული ე.წ. "კანონიერი ქურდი" რაულ ბარცბა — გავრცელებული ინფორმაციით, სროლა შესაძლოა მისი მკვლელობის წარუმატებელი მცდელობა ყოფილიყო.

მედიის ცნობით, ინციდენტი ოკუპირებულ სოხუმში, ერთ-ერთი სამგლოვიარო ცერემონიის დროს მოხდა.

აფხაზეთის დე ფაქტო პრეზიდენტის, ბადრა გუნბას ადმინისტრაციამ კომენტარი გააკეთა სროლასთან დაკავშირებით და აღნიშნა, რომ გუნბა პირადად არის ჩართული გამოძიებაში.

"ყველა დაშავებული იღებს საჭირო სამედიცინო დახმარებას," — განაცხადა ჯანდაცვის მინისტრმა ედუარდ ბუთბამ ცალკე განცხადებაში. მისი თქმით, ერთ-ერთი დაშავებული, რომლის სახელიც არ დასახელებულა, მძიმე მდგომარეობაშია — მას თავის არეში აქვს ნასროლი ჭრილობა.

ოკუპირებული აფხაზეთის ეგრეთ წოდებულმა გენერალურმა პროკურატურამ ინციდენტზე გამოძიება უკვე დაიწყო.

სამოქალაქო საზოგადოების ორგანიზაციების კოალიციამ მომხდართან დაკავშირებით მწვავე განცხადება გაავრცელა, რომელშიც აღნიშნულია, რომ მომხდარი "უსაფრთხოების სისტემის სრული დეგრადაციის" მაჩვენებელია ოკუპირებულ აფხაზეთში.

"დღეს აფხაზეთის მოსახლეობა მუდმივ შიშში ცხოვრობს. ადამიანები თავს აღარ გრძნობენ დაცულად არც ქუჩაში და არც საკუთარ სახლებში. შსს-ს ამჟამინდელ ხელმძღვანელობამ საზოგადოების ნდობა და საკუთარი მოვალეობების შესრულების უნარი დაკარგა," — ნათქვამია განცხადებაში.

კოალიციამ ეგრეთწოდებული შინაგან საქმეთა მინისტრის, რობერტ კიუტის, გადადგომა მოითხოვა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.