თბილისის საქალაქო სასამართლოში ლისის ტბის ასახვევთან კოალიცია ცვლილებებისთვის ერთ-ერთი ლიდერის, ნიკა მელიას ადმინისტრაციული წესით დაკავების საქმე განიხილეს.

მელიას ადმინისტრაციულ სამართალდარღვევათა კოდექსის 173-ე მუხლს ედავებიან, რაც პოლიციელისთვის სიტყვიერ შეურაცხყოფას გულისხმობს. მოსამართლე თორნიკე ქოჩქიანმა ოპოზიციონერ პოლიტიკოსს 5 000-ლარიანი ჯარიმა დააკისრეს.

ნიკა მელიამ სასამართლოზე განაცხადა, რომ მას სამართლიანი განაჩენის იმედი არ აქვს და ის ახლობლების და მისი დამკავებელი პოლიციელების სანახავად მოვიდა. ოპოზიციონერმა ლიდერმა სასამართლო სხდომაზე გაიხსენა დაკავების ღამე და თქვა, რომ მას შემდეგ, რაც მან განაცხადა, რომ ის არ აპირებდა წულუკიანის კომისიაზე გამოცხადებას, პოლიციამ მისი ლისზე დაკავებით მაღალი საჯარო ინტერესი აირიდა თავიდან.

ოპოზიციონერმა ლიდერმა ასევე ხაზი გაუსვა, რომ მას სასამართლო დარბაზში სასმელი წყალი არ დაახვედრეს.

"აქ მოვედი ორი მოტივაციით, 5 თვეა მინიატიურულ საკანში ვარ და ვიფიქრე, აქ ხალხს, ვინც მომენატრა, ვნახავ და — მეორე ვიფიქრე, სახეზე მაინც მეცოდინება ის პოლიციელები, რომლებიც მზად არიან, მორიგ ჯერზე, საარაკო ტყუილები დააფრქვიონ ამ დარბაზში. არ მინდოდა ეს ორი ეგზოტიკური ადამიანი გამომრჩენოდა. ეს ორი ცრუ ადამიანი არის ეგზოტიკა.

ვიტყვი, რა მოხდა იმ დღეს — წულუკიანის კომისიაზე გამოუცხადებლობა, რომელიც "დამოკლეს მახვილივით" დაგვკიდეს ოპოზიციონერ პოლიტიკოსებს, მაშინ საჯაროდ ვთქვი, რომ არ ვაპირებ მისვლას კომისიაზე. ამის მერე იფიქრეს, რომ ვაი თუ მელია ისევ გამოიკეტა ოფისში და დაგვჭირდება სპეცოპერაციის ჩატარებაო. ამ მოულოდნელი მძიმე ეფექტის თავიდან აცილების მიზნით გადაწყვიტეს, რაღა ხვალინდელ განაჩენს დაველოდოთ, მოდი, ლისზე მოვიტაცოთო. იქ, 50 პოლიციელი იყო, მაგრამ აქ მხოლოდ ორი პოლიციელი მოვა. ეს არის მიზეზი ყველაფრის და თქვენ ამაში დარწმუნდებით… თუ გგონიათ, რომ იმის ხასიათზე ვიყავი, რომ წინა დღით მედევნა პოლიციელებისთვის და მეგინებინა, ასე არ არის. ე.ი. ვერაზე მივაყენე შეურაცხყოფა პოლიციას და 50 ადამიანი დამედევნა. აქ 2 ადამიანი მოვა და გეტყვით, რომ მელიამ შეურაცხყოფა მომაყენაო, რომ ტელევიზიაში მიმავალმა შევაგინე.

პროცესში მონაწილეობა მივიღე იმიტომ, რომ მინდა ვუსმინო იმ ორ პოლიციელს, მერე პერიფერიული ხედვით თქვენ გიყუროთ. მაინტერესებს, რამდენნაირი მოსამართლე არსებობს ამ ქვეყნად. დიდი, ახმახი პოლიციელები რომ შემოვლენ აქ, გთხოვთ, ამის მერე 5 წუთით განცხადება გამაკეთებინოთ, რადგანაც არათანაბარ გარემოში ვარ. გალია, გალია, გალია და წყალიც არ შემომატანინეს.

მაინტერესებს, ამ საქმეზე, რა გადაწყვეტილებას მიიღებთ. ეს არ არის სისხლის სამართლის საქმე, ადმინისტრაციულია. მაინტერესებს, ძალა ზნეობის სახით თუ აღმოგაჩნდებათ, თორემ თქვენ ვერ გამათავისუფლებთ მე," — მიმართა მელიამ მოსამართლეს.

შეგახსენებთ, ნიკა მელიას წინააღმდეგ კიდევ ორი სამართლებრივი დევნა მიმდინარეობს. ოპოზიციონერ ლიდერს ბრალდება საქართველოს სისხლის სამართლის კოდექსის 366-ე მუხლის მე-2 ნაწილით წარედგინა, რაც სასამართლოს უპატივცემულობას გულისხმობს და სასჯელის სახედ და ზომად 2 წლამდე თავისუფლების აღკვეთას ითვალისწინებს.

6 ნოემბერს, პროკურატურამ ოპოზიციონერ ლიდერს ბრალდება დაუმატა — ნიკა მელიას სისხლის სამართლის კოდექსის 318-ე მუხლის პირველი ნაწილით ედავებიან, რაც სახელმწიფო საბოტაჟს გულისხმობს.