ანტიკორუფციულმა ბიურომ, "გრანტების შესახებ" კანონის საფუძველზე, ჟურნალ ინდიგოს მიმართაც დაიწყო წარმოება. ამის შესახებ ინფორმაციას ჟურნალი ინდიგო ავრცელებს.

"ანტიკორუფციულმა ბიურომ სხვა მეგობარი ორგანიზაციების მსგავსად "ინდიგოს" მიმართაც დაიწყო წარმოება "გრანტების შესახებ" კანონის საფუძველზე. რადგან მთელი ჩვენი საქმიანობა ღია კომუნიკაციასა და მხოლოდ თქვენს ნდობაზე დგას, გვინდა ეს ამბავიც იცოდეთ. ცხადია, ჩვენ ისევ ვაგრძელებთ და ვემსახურებით მისიას, რომელმაც შეგვქმნა — თავისუფალი სიტყვისა და გამოხატვისთვის, თავისუფალი აზრისა და იდეებისთვის ვაგრძელებთ მუშაობას. თქვენ ყველაზე კარგად იცით, რას ვაშუქებთ, რატომ აღვწერთ და როგორ ვყვებით ამბებს.

ახლაც გვჯერა, რომ ამ რთულ დროს, როდესაც ქვეყანაში სამართლიანი მართლმსაჯულების რწმენა დაკარგულია, ერთმანეთის თანადგომა, პრინციპულობა და სიმართლე გაიმარჯვებს.

ინდიგო მუდამ დააკვირდება და აღწერს ყველაფერს, რაც ჩვენ გარშემო ხდება, რაც აღგვაფრთოვანებს, გვიზიდავს, გვაშინებს და შთაგვაგონებს", – წერია "ინდიგოს" განცხადებაში.